Reseı Qazaqstanǵa 16 myń tonna jasymyqty óz aýmaǵy arqyly eksporttaýǵa qaıta ruqsat berdi
«21 qazanda Aýyl sharýashylyǵy mınıstrligi Reseı Federatsııasy tarapynan ýaqytsha shekteýlerdiń engizilýi jónindegi máselelerdi talqylaý úshin Rosselhoznadzor atyna ekijaqty keńes ótkizý týraly resmı hat jiberdi. 1 qarashada taraptar arasynda Rosselhoznadzordyń ósimdik sharýashylyǵy ónimderiniń tranzıtin kidirtý faktileri boıynsha onlaın-keńes ótti. Pysyqtaý barysynda 16 myń tonna kólemindegi qazaqstandyq jasymyqtyń partııasy «Novorossıısk teńiz saýda porty» jabyq aktsıonerlik qoǵamy teńiz portynda kemege sátti tıelip, mejeli jerge jiberildi. Kezdesý qorytyndysy boıynsha Eısk qalasynyń teńiz porty aýmaǵynda qazaqstandyq jasymyq partııasynyń úlgilerin iriktep, zerthanalyq saraptama júrgizý úshin birlesken jumys tobyn uıymdastyrý jónindegi ýaǵdalastyqqa da qol jetkizildi», - delingen jaýapta.
Sondaı-aq, Úkimet basshysy Qazaqstan úkimeti je mundaı shekteýlerge qarymta sharalar qabyldap jatqanyn eske salady.
«Buǵan deıin ishki naryqty qorǵaý maqsatynda Qazaqstan úshinshi elderden jáne Eýrazııalyq ekonomıkalyq odaq elderinen bıdaı ımportyna 2024 jyldyń sońyna deıin tyıym salý engizgenin atap ótý qajet. Bul Reseı astyǵynyń Ózbekstan Respýblıkasyna jáne Qytaı Halyq Respýblıkasyna qaıta eksportyn shektegen bolatyn», - dep jazady Oljas Bektenov.
Premer-mınıstr qazaqstandyq eksporttaýshylar óz quqyqtaryn Eýrazııalyq ekonomıkalyq odaq sotyna júginý arqyly da qorǵaı alatynyn aıtady.
«Rosselhoznadzordyń áreketterine qazaqstandyq eksporttaýshylar Reseı Federatsııasynyń zańnamasyna sáıkes óz betinshe shaǵymdanýǵa quqyly ekenin atap ótken jón. Budan basqa, shıkizattyq emes taýarlardy qazaqstandyq eksporttaýshylar úshin saqtandyrýdy, onyń ishinde shyǵyndaryn saqtandyrýdy «Saraptamalyq-kredıttik agenttik» AQ usynady», - delingen resmı jaýapta.
Buǵan deıin Reseı Eýropalyq odaqtan Qazaqstanǵa jóneltilgen 408 sıyrdy keri qaıtarǵanyn jazǵan edik.