Reseı Qazaqstanǵa 100 myń tonna qant eksporttaıdy

<p>ASTANA. KAZINFORM &mdash; Reseı Qazaqstan úshin qant kvotasyn jazǵy maýsymǵa deıin taǵy 100 myń tonnaǵa arttyrýdy josparlap otyr. Bul týraly 17 mamyrda Qazanda (RF) Qazaqstan vıtse-premeri Serik Jumanǵarın men Reseı úkimeti tóraǵasynyń orynbasary Alekseı Overchýktyń tóraǵalyǵymen ótken kezdesýde kelisildi.</p>

Úkimettiń málimetinshe, 2024 jylǵy 3 mamyrda Reseı úkimeti osy jyldyń 31 tamyzyna deıin qant shyǵarýǵa ýaqytsha tyıym salý týraly qaýly qabyldaǵan bolatyn.

Foto: QR Úkimeti

Qazaqstan úshin 120 myń tonna kólemi qarastyrylǵan. Qoımalardaǵy jáne kvota sheńberinde bólinetin qoldaǵy qordyń kólemine qaramastan, qantty tutynýdyń eń joǵary sanalatyn jaz maýsymy qarsańynda qazaqstandyq tarap ekijaqty kezdesýde qant jetkizý kvotasyn taǵy 100 myń tonnaǵa ulǵaıtý máselesin kóterdi. Aldyn ala kelisim alyndy, endi kvotany ulǵaıtý másele 29 mamyrda EEK Keńesiniń otyrysynda qaralmaq, – deıdi vedomstvo.

Sondaı-aq, kezdesýde aǵash materıaldaryn Reseıden Qazaqstanǵa áketý úshin ótkizý pýnkteriniń sanyn kóbeıtý máselesi kóterildi. Qazir Qazaqstan-Reseı shekarasynda tek 6 ótkizý pýnktinen shyǵarý ruqsat etiledi. Endi Qazandaǵy kezdesýdiń qorytyndysy boıynsha, Reseı tarapy jaqyn arada taǵy 4 avtokólik ótkizý pýnktin ashýǵa daıyn ekenin bildirdi.

Taraptar sondaı-aq ózara saýda aıasynda tasymaldanatyn kólikter men jabdyqtarǵa elektrondy tólqujat berý máseleleri boıynsha ýákiletti qurylymdar arasynda ózara is-qımyldy jedel ornatýǵa kelisti. Sonymen qatar Shúlbi MAES ekinshi kezegin salý, Ertis sýlaryn paıdalaný boıynsha jospar qurý jáne basqa da máseleler talqylandy.

Sol kúni Qazanda Premer-mınıstrdiń orynbasary Serik Jumanǵarın Tatarstannyń Raısy Rýstam Mınnıhanovpen kezdesti. Onda qatysýshylar Qazaqstan men Tatarstan arasyndaǵy yntymaqtastyqty nyǵaıtý perspektıvalaryn talqylady. Serik Jumanǵarın Kazanforum jumysyna qatysyp, Qazaqstan atynan sóz sóıledi, – delingen habarlamada.