Reseı qazaqstandyq munaıdyń Germanııaǵa tranzıtin qoldaýǵa daıyn
«QazTransOıl» AQ 2023 jyly 1,2 mln tonna Qazaqstan munaıyn «Transneft» JAQ magıstraldy munaı qubyrymen «Adamova zastava» munaı beketi arqyly Germanııaǵa jetkizýge ótinim berdi.
Munaıdyń bul tranzıti Qazaqstan men Reseı úkimeti arasyndaǵy 2002 jylǵy 7 maýsymdaǵy kelisim sheńberinde júzege asady.
«Aıta ketý kerek, qazaqstandyq munaıdy Belarýs aýmaǵy arqyly tasymaldaý úshin «QazTransOıl» AQ men «Gomeltransneft Drýjba» AAQ arasynda munaı tasymaldaý boıynsha qyzmet kórsetýge shart jasalyp, iske asyp jatyr» delingen baspasóz qyzmetiniń habarlamasynda.
Reseı Qazaqstannyń «Drýjba» qubyry arqyly Germanııaǵa munaı tranzıtin qoldaýǵa daıyn.
Bul týraly TASS agenttigine Reseı vıtse-premeri Aleksandr Novak málim etken.
«Iá, - dedi ol osy suraqqa jaýap berip. - Biz buǵan oń qaraımyz».
Deutsche Welle Qazaqstannyń Germanııa shyǵysyndaǵy Shvedt munaı óńdeý zaýytyna «Drýjba» qubyry arqyly jetkiziletin munaıdy ulǵaıtqysy keletinin jazady.
Shvedtegi MÓZ «Drýjba» qubyryna qosylǵan, sol arqyly Reseıdiń «Rosneft» memlekettik kontserninen munaı alady.
Úsh myńǵa jýyq adam jumys isteıtin Shvedt zaýyty Germanııanyń shyǵysyn benzınmen jáne basqa otynmen qamtamasyz etýde mańyzdy ról atqarady.
Ol sondaı-aq Polshanyń keıbir batys aýdandaryn jáne Berlın-Brandenbýrg áýejaıyn janarmaımen qamtamasyz etedi. Kásiporyn aktsııalarynyń kópshiligi «Rosneft» kontsernine tıesili boldy.
Qarasha aıynda bul zaýyt Germanııaǵa senimgerlik basqarýǵa berildi.
Eske sala keteıik, buǵan deıin «QazMunaıGaz» basshysy Maǵzum Myrzaǵalıev qazaqstandyq munaıdy Germanııaǵa eksporttaý máselesi boıynsha kelissóz júrgizgen bolatyn.
QMG basshysy Qazaqstan munaıyn atalǵan munaı qubyry arqyly Germanııaǵa eksporttaý múmkin ekenin, alaıda kelisimshart jáne tehnıkalyq máselelerdi sheshý qajettigin atap ótti.
«QMG munaı óndirýshi uıymdarynyń shıkizaty Qazaqstannyń ishki naryǵyna munaı ónimderin jetkizý mindettemesin oryndaý úshin otandyq munaı óńdeý zaýyttaryna jiberiledi. Al QMG munaıynyń eksportqa shyǵatyn kólemi biryńǵaı júıelik treıder — KMG Trading mekenjaıyna jetkiziledi, ol aldymen «QazMunaıGazdyń» Rýmynııadaǵy munaı óńdeý zaýyttarynyń qajettiligin óteıdi. Eksportqa arnalǵan munaıdyń qalǵan kólemi uzaqmerzimdi kelisimshart boıynsha satylady. Sonymen qatar, «QazMunaıGaz» QR Prezıdentiniń tapsyrmasyna sáıkes, Germanııaǵa synaq retinde munaı partııasyn 2023 jyldyń qańtar aıynda jóneltý múmkindigin qarastyryp jatyr», - dedi M.Myrzaǵalıev.
Sondaı-aq «QazMunaıGaz» Qazaqstannan Germanııaǵa munaı jetkizý úshin qandaı baǵyttar qarastyrylyp jatqanyn aıtty.