Reseı qazaqstandyq qubyrlar arqyly 11 jyl Qytaıǵa munaı eksporttaıdy

ASTANA. QazAqparat – 2013 jyly jasalǵan Qazaqstan arqyly Reseı munaıyn Qytaıǵa tasymaldaý týraly kelisimniń merzimi 2034 jylǵa deıin uzartylady. Tıisti qujat «Ashyq» NQA portalynda jarııalandy, dep habarlaıdy QazAqparat tilshisi.

Elimizdegi qubyrlar arqyly Qytaıǵa Reseı munaı tasymaldaý kelisiminiń merzimi uzartyldy

«Qazaqstan Reseı tarapynyń ýákiletti uıymynyń jylyna 10 mln tonna kóleminde reseılik munaıdy uzaq merzimdi tasymaldaýy úshin jaǵdaı jasaıdy. Atap aıtqanda, «Týımazy – Omby – Novosıbırsk-2» magıstraldyq munaı qubyry, Prıırtyshsk (Reseı men Qazaqstan shekarasy) – Atasý (Qazaqstan) – Alashańqaı (Qytaı Halyq Respýblıkasy) tasymaldaý baǵyty boıynsha magıstraldyq qubyrlar júıesine qol jetkizý quqyǵyn beredi», - delingen qujatta.

Kelisim jobasynda jazylǵandaı, Reseı tarapy qubyr arqyly tasymaldanǵan munaıdyń ár tonnasy úshin Qazaqstanǵa 2,1 dollar aqsha tóleıdi.

«Reseı tarapynyń ýákiletti uıymyna zańdy negizde tıesili jylyna 10 mln tonna mólsherindegi munaı tasymaldaý quny bir tonna úshin 2,1 AQSh dollaryn quraıdy jáne ony Qazaqstan tarapynyń ýákiletti uıymy tólemge tapsyrma bergen kúni QR Ulttyq banki belgilegen teńgege shaqqandaǵy AQSh dollarynyń baǵamy negizinde teńgemen tóleıdi», - dep kórsetilgen qujatta.

Kópshilik talqylaýǵa shyǵarylyp otyrǵan kelisim 2034 jyldyń 1 qańtaryna deıin qoldanylady.