Reseı gazdy bizge Eýropadaǵydan birneshe ese arzan baǵamen bermek – Almasadam Sátqalıev

ASTANA. QazAqparat – Úkimettiń keńeıtilgen keńesinen keıin BAQ ókilderi Energetıka mınıstri Almasadam Sátqalıevten Reseı aýmaǵynan gaz qubyryn tartý jobasy týraly surady, dep habarlaıdy QazAqparat tilshisi.

«Gazprom» basshylyǵy men «Qazaqgaz» kompanııasynyń basshylyǵy birqatar kezdesý ótkizdi. Bizde Reseıden gaz tasymaldaıtyn qubyrdyń aldyn ala kelisilgen jańa marshrýty bar. Bul jobalar úkimetter deńgeıinde maquldansa, bizdegi kózderdiń qosymsha rezervi bolar edi.

Sondaı-aq, «Gazprom» esebinen qosymsha qubyr tartý arqyly rezervter qamtamasyz etiledi. Biraq bul kelissóz satysynda ǵana. Degenmen aldyn ala tıimdi marshýrtty anyqtadyq deýge bolady», - dedi mınıstr.

Onyń aıtýynsha, keıin bul qubyr Qytaıǵa sozylýy múmkin.

«Biraq qazir Qazaqstannyń suranysyn jabý týraly ǵana aıtyp otyrmyz. Olar bizge gazdy Belarýstaǵydan áldeqaıda arzanǵa beredi. Aldyn ala kelissóz júrip jatyr. Reseı taraby da jumys ekijaqty rejımde júrgende ǵana tıimdi bolatynyn túsinip otyr. Sondyqtan eýropalyq baǵalardan birneshe ese tómen jáne Reseı-Belarýs shekarasyndaǵy baǵadan áldeqaıda tómen usynyp otyr», - dedi Almasadam Sátqalıev.