Reseı Federatsııasy bólgen kedendik baj boıynsha jospar oryndalmady
Onyń aıtýynsha, korporatıvtik tabys salyǵy boıynsha jospardyń artyǵymen oryndalýyna myndaı faktorlar áser etti:
- 2021 jylǵy qańtar-aqpan aılarymen salystyrǵanda aǵymdaǵy jyldyń eki aıynda 653 iri salyq tóleýshi boıynsha málimdelgen avanstyq tólemder somasynyń 83,5 paıyzǵa nemese 211 mlrd teńgege ulǵaıýy;
- iri taý-metallýrgııa kompanııalaryna qatysty salyqtyq ákimshilendirý boıynsha júrgizilip jatqan is-sharalar.
«Jalpy alǵanda, jer qoınaýyn paıdalanýshylaryn ákimshilendirýden bıýdjetke qosymsha 288 mlrd teńge, onyń ishinde tekserý aktileriniń nátıjeleri boıynsha óndirip alý esebinen 29 mlrd teńge tústi. Shıki munaıǵa eksporttyq kedendik baj boıynsha jospardyń asyra oryndalýy negizinen osy jyldyń 1 toqsanynda shıki munaıǵa mólsherlemeniń 33 paıyzǵa ulǵaıýyna, sondaı-aq AQSh dollaryna shaqqanda teńge baǵamynyń tómendeýine baılanysty boldy», - dedi ol.
Mınıstrdiń aıtýynsha, oıyn bıznesine salynatyn salyq boıynsha jospar salyqtyq tekserý aktileri boıynsha bereshekti óteý esebinen asyra oryndaldy.
Paıdaly qazbalardy óndirý salyǵy boıynsha jospardyń asyra oryndalýyna ótken jyldyń uqsas kezeńimen salystyrǵanda 2022 jylǵy І toqsanda negizgi eksporttyq pozıtsııalarǵa baǵanyń ortasha 20 paıyz ósýi áser etti.
«Sondaı-aq, jer qoınaýyn paıdalanýshylardy salyqtyq ákimshilendirý nátıjeleri boıynsha shamamen 16,5 mlrd teńge tústi. Degenmen, ishki tutyný taýarlaryna salynatyn qosylǵan qun salyǵy jáne Reseı Federatsııasy bólgen kedendik bajdar boıynsha jospar oryndalmaǵan», - dedi Erulan Jamaýbaev.