Reseı elshisi Qazaqstannyń BUU Qaýipsizdik Keńesine tóraǵalyǵyn joǵary baǵalady
Palatanyń baspasóz qyzmetinen málim etkendeı, kezdesýde ekonomıkalyq, áskerı-tehnıkalyq jáne mádenı-gýmanıtarlyq yntymaqtastyq máseleleri talqylandy.
S.Gromov TMD Parlamentaralyq Assambleıasy men UQShU Parlamenttik Assambleıasy aıasyndaǵy ózara is-qımyldyń mańyzdy ekenin atap ótti. Depýtattar osy uıymdardyń aıasynda óz elderiniń zańnamasyn úılestirý men jaqyndastyrýdy qamtamasyz etip keledi.
Senat tóraǵasynyń orynbasary parlamentaralyq únqatysýdy odan ári nyǵaıtý týraly aıta kele, Qazaqstan men Reseı parlamentteri joǵarǵy palatalarynyń depýtattary qatysatyn Parlamentaralyq yntymaqtastyq jónindegi komıssııanyń erekshe rólin atap ótti. «Komıssııa ekijaqty yntymaqtastyqtyń kóptegen máselelerin qaraýda ulttyq zańnamalardy jaqyndastyrý úshin naqty usynystar ázirleı otyryp, sondaı-aq ózara parlamentaralyq baılanystar men Qazaqstan men Reseı áriptestigin tereńdetýdiń ońtaıly joldaryn izdestirý jóninde aýqymdy jumystardy atqardy», - dedi S.Gromov.
Ol dıplomatqa Kaspıı konventsııasynyń ratıfıkatsııalanýy, Qazaqstannyń Mańǵystaý oblysy men Reseı Federatsııasynyń Dagestan Respýblıkasy negizinde transshekaralyq yntymaqtastyqty, Kaspıı teńizindegi týrızm, sondaı-aq ekologııa men bıologııalyq resýrstardy qorǵaý salasyndaǵy baılanystardy damytý máseleleri qaralǵan komıssııasynyń 13-shi otyrysynyń qorytyndylary týraly aıtty.
Reseıdiń Qazaqstandaǵy Elshisi A.Borodavkın Qazaqstannyń BUU Qaýipsizdik Keńesine tóraǵalyǵyn joǵary baǵalady. Sondaı-aq BUU-nyń «Terrorızmnen azat álemge jetý jolynda» is-áreket kodeksin qabyldaý jónindegi Qazaqstannyń bastamasyn ilgeriletý jónindegi birlesken jumysty atap ótti.
S.Gromov Qazaqstannyń saıası júıesindegi Senattyń róli, Memleket basshysy N.Nazarbaevtyń «Nur Otan» partııasynyń Sezinde belgilengen áleýmettik basymdyqqa ıe jańa saıasat týraly áńgimeledi.
Reseıdiń Qazaqstandaǵy elshisi úkimetaralyq komıssııanyń aıasynda Qazaqstanǵa mádenı-gýmanıtarlyq yntymaqtastyq jónindegi komıssııa qurýdy jáne bıyl Omby qalasynda ótetin Qazaqstan men Reseı aımaqaralyq yntymaqtastyq forýmy aıasynda jas kóshbasshylar sammıtin ótkizýdi usyndy.