Reseı dárigerleri shymkenttik mamandardyń jumysyna oń baǵa berdi
Qaladaǵy epıdemıologııalyq ahýaldy sóz etken mamandar 20 shilde kúngi málimet boıynsha shaharda 4480 COVID-19 jaǵdaıy tirkelgenin atap ótti.
«Ótken táýlikte 53 adam koronavırýs juqtyrǵan. Jazylyp shyqqan naýqastar sany - 2831. Jalpy búgingi kúni qala boıynsha 3860 tósek-oryn bar (650 - ınfektsııalyq tósek, 3210 - provızorlyq), onyń ishinde bos tósek-oryn sany - 1809 (284 – ınfektsııalyq, 1525 – provızorlyq). Aýyr dárejedegi naýqastar úshin ınfektsııalyq statsıonarlarda 60 reanımatsııalyq tósek-oryn, provızorlyq statsıonarlarda 91 tósek-oryn bar. Sondaı-aq qaladaǵy emhanalarda qosymsha 628 tósek-oryn kúndizgi statsıonar uıymdastyrylǵan. Shymkentte 2020 jyldyń 1 qańtar men 17 shilde aralyǵynda pnevmonııanyń 11 035 jaǵdaıy tirkelip, onyń ishinde 8944 naýqas emdeldi. Bul rette qalanyń medıtsınalyq mekemelerinde búgingi kúni 339 ókpeni jasandy jeldetý apparaty, 673 Bobrov tynys alý apparaty qoldanylady. Qosymsha 2 aýrýhanada ottegi stantsııasyn iske qosý jumysy júrip jatyr. Bir aı ishinde taǵy 3 aýrýhana qosylady. 2020 jylǵy 17 shildedegi jaǵdaı boıynsha test qory – 12 456», - dedi T. Varzılov.
Basqarma basshysynyń mindetin atqarýshy T. Varzılov sondaı-aq, búgingi tańda qalada dári-dármek qory jetkilikti ekenin de atap ótti.
«Qalada dári-dármek pen medıtsınalyq qural-jabdyqtardyń 10 iri kóterme jetkizýshisi bar. Tirkelgen 730 dárihananyń 560-y jumys isteıdi. Jalpy, sońǵy 7 kún ishinde Úkimet tarapynan arnaıy bólingen 2 ushaqpen jáne farmkompanııalarynyń birjolǵy ruqsatymen bir ushaq, Úndistan, Reseı, Ýkraına, Ózbekstan elderinen 9 júk kóligi jetkizildi. Bir jolǵy ruqsatpen 8 farmkompanııaǵa dárilik zattardy qalaǵa ákelýge ruqsat berildi. Dári-dármek qalanyń barlyq iri jeke dárihanalaryna jáne 13 emdeý mekemesine jetkizildi. Búgingi kúni qalada dárilik zattardyń negizgi qory jetkilikti. Onyń ishinde temperatýrany tómendetetin - 47 500 qorap, vırýsqa qarsy preparattardan - 71 300 qorap, 65 300 antıbıotık, 39 658 antıkogýlıant, 22 400 S vıtamıni, 453 122 jeke qorǵanys quraly bar», - deıdi T. Varzılov.
Brıfıngte Shymkentke arnaıy tájirıbe almasý maqsatynda kelgen joǵary dárejeli reanımatolog D.Tsvetkov ta sóz sóılep, jergilikti dárigerlerdiń koronavırýsqa qarsy atqaryp jatqan jumysyna oń baǵa berdi.
«Baıqaǵanymyz, qazirgi ýaqytta jergilikti dárigerler shtatty rejımde jumys istep, aýrýhanaǵa túsken kez kelgen naýqasqa sapaly medıtsınalyq kómek kórsetýde. Naýqastardyń stantsıonarǵa kelip túsken ýaqytynan bastap tolyq emdeý jumysyn kórip shyqtyq. Bul turǵyda bári durys. Shymkent qalasyndaǵy aýrýhanalarda ıntensıvti terapııany qajet etetin aýyr jaǵdaıdaǵy naýqastar jansaqtaý bóliminde em alýda. Buǵan qosa, olarǵa respıratorlyq terapııa boıynsha em júrgiziledi eken. Bul - óte jaqsy. Álemdik medıtsına deńgeıinde qoldanylyp jatqan emdeý tásilderiniń biri - jasandy jeldetý men ınvazııalyq jeldetý apparatyn qoldana otyryp, aýyr jaǵdaıdaǵy naýqasty aman alyp qalý. Bul tásildi jergilikti mamandar jaqsy meńgergen. Shymkentte naýqastarǵa kásiptik medıtsına mamandarynyń kómegi qoljetimdi. Qala turǵyndaryna aıtarym, aýrý bastalǵan sátten bastap medıtsınalyq kómekke júginińizder», - dedi reseılik dáriger.
Aıta keteıik, Reseıden kelgen 7 maman qaladaǵy birneshe medıtsına uıymyn aralap, emdeý taktıkasy boıynsha jergilikti dárigerlermen tájirıbe almasýda. Shymkentke kómekke kelgen mamandardyń úsheýi - reanımatolog-dáriger bolsa, qalǵan tórteýi - ınfektsıonıster.