Reseı bıdaıy qazaqstandyq ónim retinde eksporttalyp kelgen

ASTANA. QazAqparat – Reseı bıdaıy Qazaqstanǵa kirgizilip, otandyq ónim retinde Aýǵanstan, Tájikstan, Ózbekstanǵa eksporttalyp kelgen. Bul týraly QR Sybaılas jemqorlyqqa qarsy is-qımyl agenttiginen málim etti, dep habarlaıdy QazAqparat.

«QMA Pavlodar oblysy boıynsha departamenti Reseı bıdaıyn qazaqstandyq ónim retinde eksporttaý úshin jalǵan kelisimsharttar boıynsha zańsyz ákelý shemasyn anyqtady.

Anyqtalǵan tulǵa 2021-2022 jyldar aralyǵynda 26 myń tonna reseılik bıdaıdy Ortalyq Azııa elderine (Aýǵanstan, Tájikstan, Ózbekstan) qazaqstandyq ónim retinde jazylǵan jalǵan shot-faktýralar boıynsha 1 mlrd teńgeden astam somaǵa eksporttaǵan.

Osylaısha, jalpy somasy 460 mln teńgeni quraıtyn halyqaralyq tranzıttik tarıf boıynsha tasymaldaý tólemderin tóleýden jaltarǵan.

Sotqa deıingi tergeý aıaqtaldy. QR QPK 201-babynyń talaptaryna sáıkes tergeý múddesindegi ózge de málimetter jarııa etilýge jatpaıdy», - delingen habarlamada.

Málim etilgendeı, aýyl sharýashylyǵy taýaryn adal óndirýshilerdiń múddesin qorǵaý maqsatynda bıdaı ótkizýge baılanysty jalǵan shot-faktýralardy zańsyz berý faktileriniń jolyn kesý jumystary júıeli júrgizilip jatyr. Tek sońǵy bir jarym jylda Pavlodar oblysynda 5,4 mlrd teńgeden astam somaǵa jalǵan shot-faktýralardy bergeni úshin 5 tulǵa qylmystyq jaýapkershilikke tartylǵan.