Reseı bıdaıyn jalǵan qujattarmen eksporttap kelgender ustaldy

<p>PETROPAVL. KAZINFORM &ndash;&nbsp; Qarjy monıtorıngi agenttiginiń Soltústik Qazaqstan oblysy boıynsha ekonomıkalyq tergep-tekserý departamenti ótken jarty jyldyqty qorytyndylady.</p>

Vedomstvo basshysy Baqytjan Abýlhaırovtyń aıtýynsha, jer qoınaýyn zańsyz paıdalanǵany úshin 4 tulǵaǵa qatysty qylmystyq is sotqa joldandy. Aıyptalýshylardan jalpy somasy 3,7 mlrd teńgeniń múlki tárkilendi. Tergeý barysynda olardyń aýyl sharýashylyǵy jerlerin zańsyz ken óndirýge paıdalanǵany anyqtalyp, tıisti sharalar qabyldandy. Aýyl sharýashylyǵy jeri memleket menshigine qaıtarylady. Al ken ornyn ıgerý jáne jaqsartýǵa jańa ınvestorlar tartyldy.

«Aýyl sharýashylyǵy salasyn taldaý kezinde munda da zańbuzýshylyqtar anyqtaldy. Óńirde esh jerde tirkelmeıtin zańsyz astyq ımporty bar. Keshendi taldaý nátıjesinde oblystyń ortasha jyldyq bıdaı eksporty kólemi 1,5 mln tonna ekeni anyqtaldy. Bir top adam reseılik astyqqa jalǵan shot-faktýralar jazyp, oǵan otandyq mártebesin berip kelgen. Qylmystyq is áshkere boldy. 1 is boıynsha úkim shyǵaryldy, 2 qylmystyq is sotqa joldandy. Importtalǵan 30 myń tonnadan astam reseılik astyqqa jalǵan shot-faktýralar jazylǵan. Nátıjesinde 1 mlrd teńgeden astam somaǵa tranzaktsııalardyń kúshin joıý sharalary qabyldandy. Osyǵan oraı múddeli organdarmen birlese jumys toby qurylyp, olar taýardyń shyǵarylǵan jerin rastaıtyn qujattardy alý máselesin retteıtin zańnamaǵa ózgerister engizýge bastamashylyq etti», - deıdi SQO boıynsha ekonomıkalyq tergep-tekserý departamentiniń basshysy Baqytjan Abýlhaırov.

Buǵan deıin SQO-da mas kúıde kólik júrgizgen aýyl ákiminiń jumystan bosatylǵanyn jazǵan edik.