Reseı benzınin shekteý baǵaǵa áser ete me - mınıstr jaýaby

ASTANA. QazAqparat - Qazaqstan shetelden ımporttalatyn benzındi ýaqytsha shektemese, otandyq munaı-óńdeý zaýyttarynyń ónimdiligi tómendep ketedi. Úkimet otyrysynan keıin tilshilerdiń saýalyna jaýap bergen Energetıka mınıstri Qanat Bozymbaev osylaı dedi, dep habarlaıdy QazAqparat tilshisi.

«Bul - temir jol kóligi boıynsha birneshe aılyq ýaqytsha shekteý. Shara naryqtaǵy jaǵdaıdy turaqtandyrý úshin jasalyp otyr. Basqa amalymyz da joq. Otandyq zaýyttardyń ónimderin tek osylaı qorǵaı alamyz. Demek, bizde eki jol bar: otandyq nemese sheteldik óndirýshilerdi qoldaýymyz kerek. Biz otandyq óndirýshilerdi tańdap otyrmyz», - dedi Qanat Bozymbaev.

Mınıstrdiń aıtýyna qaraǵanda, ýaqytsha shekteýdi engizý naryqtaǵy básekelestikti shektep jatyr degendi bildirmeıdi.

«Shekteý birneshe aıdan keıin alynyp tastalady. Osy ýaqyttyń ishinde biz Ortalyq Azııa elderi men Reseıdegi áriptesterimizben jumys istep, eksportqa múmkindikter ashýymyz kerek. Úkimetaralyq kelisim birneshe aıdyń ishinde jasalady, osydan keıin bul másele ózdigimen sheshimin tabady. Bul baǵaǵa meniń oıymsha, eshqandaı áser etpeıdi. Sebebi, tolaıym saýda bar. Qazaqstanǵa Reseıden enetini (benzın - avt.) ishki naryqtaǵy baǵadan góri joǵary ekenin aıta ketý kerek», - deıdi Bozymbaev.

Eske sala ketsek, budan buryn QR Parlamenti palatalarynyń birlesken otyrysynan keıin QR Energetıka mınıstri Qanat Bozymbaev Qazaqstan otandyq janar-jaǵarmaı naryǵyn qorǵaý sharalaryn iske asyratynyn habarlaǵan bolatyn. Onyń aıtýynsha, AI-92 markaly benzınniń ımportyna úsh aıǵa shekteý engizilmek.