Reseı Baıqońyrdaǵy shyǵyndaryn eki esege azaıtady

BAIQOŃYR. QazAqparat - Reseıǵarysh korporatsııasynyń kásiporny - «Jerústi ǵarysh ınfraqurylymy nysandaryn paıdalaný ortalyǵynyń» bas dırektory, RF ǵarysh aılaqtarynyń paıdalanylýyna jaýapty tulǵa Ranohon Djýraeva «Izvestııa» basylymyna Baıqońyr ǵarysh aılaǵyndaǵy paıdasyz shyǵyndardy qysqartý boıynsha sharalar týraly aıtyp berdi.

«Jalpy, Baıqońyrdaǵy ushyrylym qyzmetin qamtamasyz etip otyrǵan ınfraqurylymdy ustap turýǵa jáne onyń paıdalanylýyna qazirgi ýaqytta jylyna 8,5 mlrd.-qa jýyq rýbl jumsalady. Bul turaqty shyǵyndarǵa sondaı-aq sýmen qamtýǵa, elektr energııasyna, jylý berýge, joldarǵa, temirjoldar jelisine, kúzet pen kólikke jumsalatyn qarjylar kiredi», - dedi ortalyq basshysy. 

Djýraevanyń esebi boıynsha, energııamen qamtý júıelerin ońtaılandyrý, sýmen qamtýǵa shyǵyndardy azaıtý, jerústi ınfraqurylymdaryn ustap turýǵa shyǵyndardy qosymsha qysqartý bir jylda mıllıard rýbldi únemdeýge múmkindik beredi. Osylaısha, jyl ishinde shyǵyndar eki esege - 2 mlrd.-tan 1 mlrd rýblge deıin tómendetiledi.

Rano Djýraevanyń aıtýynsha, Baıqońyrdy strategııalyq túrlendirý jospary 2015 jyly qabyldanǵan. Búginde ol 70 paıyzǵa oryndaldy. Osy ýaqyt ishinde 3,5 mlrd rýbldi quraǵan jyl saıynǵy shyǵyndardy  eki esege azaıtý múmkin boldy. Degenmen, Baıqońyr uzaq ýaqyt boıy Ortalyqtyń qarjylyq paıda ákelmeıtin negizgi bólimshesi bolyp kelgen jáne solaı bolyp qalýda.