Reseı: Bashqurtstanda qarly boran saldaryn 22 kólik soqtyǵysty

NUR-SULTAN. QazAqparat – Bashqurtstan respýblıkalyq memlekettik avtoınspektsııa baspasóz qyzmetiniń jedel málimetteri boıynsha, 26 jeltoqsanda Karmaskalın aýdanynda Ýfa-Orynbor avtojolynyń 47 shaqyrymynda 22 kólik soqtyǵysqan.

Jappaı apatta bir adam qaza tapqany anyqtaldy, dep habarlaıdy QazAqparat Bashınform saıtyna silteme jasap.

«Aýrýhanaǵa bes adam jetkizildi. Qazir oqıǵa ornynda memlekettik avtoınspektsııa qyzmetkerleri men basqa da shuǵyl qyzmetter jan-jaqty kómek kórsetýde. Ýfa baǵytynda qozǵalys jabyldy, qarsy jolaq arqyly aınalma jol uıymdastyryldy», - dep habarlady BR jol polıtsııasy.

BR TJM baspasóz qyzmetiniń málimetinshe, apat bolǵan jerde jol polıtsııasynyń úsh ekıpajy, sondaı-aq «Dortransstroı» JShS-niń úsh arnaıy tehnıkasy jáne Reseı TJM qyzmetkerleri jumys istep jatyr.

Sonymen qatar, TJ jónindegi respýblıkalyq memkomıtet júrgizýshilerge aýa raıy turaqtanǵanǵa deıin Týımazın aýdanyna barýdan bas tartýdy usyndy. 26 jeltoqsan kúni tańerteń M5 tas jolynda 33 jeńil jáne júk kólikteri qar qursaýynda qaldy. Serafımovskıı jáne Nıkolaevka eldi mekenderiniń ýchaskesindegi qar jaýǵan joldyń saldarynan olardyń barlyǵy qozǵalysty jalǵastyra almady.