Reseı azamaty shekaradan esirtki alyp ótpek boldy
QR Ulttyq qaýipsizdik komıteti Shekara qyzmeti SQO boıynsha departamenti baspasóz qyzmetiniń málimetinshe, oqıǵa 6 qazan kúni Maǵjan Jumabaev aýdanynda ornalasqan «Qaraqoǵa» avtomobıl ótkizý pýnktinde bolǵan. Shekaralyq baqylaý bólimshesiniń shekara narıady jolaýshylardyń júkterin teksergen. Reseı azamaty ruqsat etilmegen zatty kúrteshesiniń ishki qaltasyna jasyryp, memlekettik shekaradan ótpekshi eken. Alaıda joly bolmady. Qyzmettik ıt ıisti alyp, er adamnan jasyl tústi belgisiz zat alyndy.
Saraptama belgisiz zattyń salmaǵy shamamen 100 gramm bolatyn «Gashısh» esirtkisi ekenin kórsetti. Qazir sheteldikke qatysty tergep-tekserý amaldary júrgizilýde. Ustalǵan kúdikti Maǵjan Jumabaev aýdanynyń polıtsııa bólimine tapsyryldy.
Buǵan deıin Astana qalasy polıtsııa departamenti esirtki bıznesine qarsy is-qımyl basqarmasynyń bólim basshysy Sergeı Ilınyh esirtki saqtaǵany úshin jasóspirimderge qatysty 5 qylmystyq istiń tirkelgenin aıtqan edi.
Polıtseıdiń aıtýynsha, jastar esirtki qylmysy 2015 jyldan beri asa aýyr qylmys túrine jatqyzylǵanyn bilmeıdi.