Reseı azamaty Qostanaı oblysynda teris aǵymdaǵy dinı materıaldardy taratqan

QOSTANAI. QazAqparat– Qostanaı oblysynda ınternette radıkaldy jáne destrýktıvti dinı ıdeologııany nasıhattaǵan Reseı azamaty anyqtaldy. QazAqparat bul týraly oblystyq Polıtsııa departamentiniń baspasóz qyzmetine silteme jasap habarlaıdy.

Polıtsııa departamentiniń Ekstremızmge qarsy is-qımyl basqarmasynyń qyzmetkerleri BAQ jáne áleýmettik jelilerge turaqty túrde monıtorıng júrgizedi.

«Kezekti sharalardyń birinde ınternette jáne «WhatsApp» messendjerinde 38 jastaǵy oblys turǵyny RF azamatynan dinı mazmundaǵy materıaldardy alǵany anyqtaldy. Derek bıylǵy mamyr aıynda tirkeldi. Qostanaı qalasynyń mamandandyrylǵan ákimshilik soty RF azamatyna QR ÁQBtK-niń 490-baby boıynsha 50 AEK (138 900 teńge) mólsherinde aıyppul saldy. Ol buǵan deıin, naýryz aıynda radıkaldy-dinı kózqarasy úshin sottalǵan. Aıyppul somasy 70 AEK (185 570 teńge) qurady», - delingen polıtsııanyń baspasóz habarlamasynda.

Jyl basynan beri oblysta 6 adam dinı mazmundaǵy materıaldardy saqtaǵany jáne taratqany úshin ákimshilik jaýapkershilikke tartylǵan.

Oblys prokýratýrasynyń ekstremızmge qarsy is-qımyl jónindegi basqarmasy qostanaılyqtarǵa kúmándi saıttar men paraqshalarǵa kirmeýge keńes beredi.