Repressııa: «Asa qupııa» tańbasy bar qujattar Almatyda fotokórmege qoıyldy

ALMATY. QazAqparat –Almatyda saıası qýǵyn-súrgin týraly «asa qupııa» tańbasymen saqtalyp kelgen materıaldar fotokórmege qoıyldy, dep habarlaıdy QazAqparat tilshisi.

Almaty qalasynda 1920-1950 jyldardaǵy saıası qýǵyn-súrgin qurbandaryn eske alýǵa arnalǵan «Biz» atty fotokórme ashyldy.

Ekspozıtsııalyq materıaldar retinde quqyq qorǵaý organdaryna tulǵany anyqtaý jáne taný maqsatynda sol kezdegi jeke isterden alynǵan qýǵyn-súrginge ushyraǵan adamdardyń muraǵattyq fotoqujattary qoıyldy.

«Fotokórmedegi materıaldar 70 jyl boıy «asa qupııa» bolyp keldi. Qazir sol materıaldar qolymyzda. Ýaqyt óte kele sarǵaıǵan muraǵattyq qujattar bizdiń elimiz úshin shyn máninde úlken tarıhı qundylyq», – deıdi fotokórmeniń kýratory Álııa Bolathan.

Kórmege muraǵatta saqtalǵan 300-den astam fotosýret qoıyldy.

«Ulttyq tarıhymyzdyń qıyn kezeńine aınalǵan elimizdiń ótkenine kóz júgirte otyryp, biz búgingi kúnimizde bar nárseni baǵalaı bilýdiń, Táýelsiz Qazaqstandy saqtaý men damytý úshin qatelikterdi qaıtalamaý kerektigin túsinemiz. Eger siz zaldy aralaıtyn bolsańyz, bul adamdardyń quqyǵy qalaı shektelgenin túsinesiz», - dep túsindirdi Álııa Bolathan.

Kórme 1 shildege deıin Almaty Gallery ǵımaratynda ótedi.