Referendýmǵa shyǵarylatyn usynystar kosmetıkalyq ózgeris emes – Máýlen Áshimbaev

NUR-SULTAN. QazAqparat – QR Parlamenti Senatynyń tóraǵasy Máýlen Áshimbaev Prezıdent teleradıokeshenine 5 maýsym kúni ótetin reformanyń máni men mazmuny týraly qysqa suhbat berdi, dep habarlaıdy QazAqparat tilshisi.

«Qazaqstan azamattary Konstıtýtsııaǵa engizilip jatqan ózgeristerdi qoldap jatsa, elimizdiń damýynda jańa bir kezeń bastalady dep aıtýǵa tolyq negiz bar. Óıtkeni bul ózgerister – kosmetıkalyq ózgerister emes», - dedi Máýlen Áshimbaev suhbat barysynda.

Onyń paıymynsha, referendýmǵa shyǵarylyp otyrǵan usynystardy tórt topqa bólip qaraý oryndy.

«Birinshiden, bul endi adam quqyqtaryn qamtamasyz etýge baǵyttalatyn ózgerister. Bizdiń saıasatymyzdyń, memleketimizdiń saıasatynyń negizgi maqsaty – halyqtyń jaǵdaıyn jaqsartý jáne quqyqtaryn qamtamasyz etý. Ekinshi baǵyt – Parlament jumysynyń tıimdiligin arttyrý jáne saıası júıemizdegi Parlamenttiń rólin kúsheıtýge baǵyttalǵan ózgerister. Onyń ishinde eki palatanyń arasyndaǵy qarym-qatynastarǵa baılanysty, olardy jetildirýge arnalǵan normalar bar. Olardyń negizgi maqsaty – zań shyǵarý protsesin ári qaraı jaqsartý, tıimdiligin arttyrý. Zań jobalaryn tezirek qaraý, tezirek qabyldaý, jan-jaqty pysyqtaý. Osyǵan arnaýly normalar usynylyp otyr», - degen Senat spıkeri úshinshi baǵyt tutastaı jergilikti ákimdikterdiń jumysyn jetildirýge arnalyp otyrǵanyna nazar aýdardy.

«Halyqtyń ál-aýqaty, jaǵdaıy jergilikti memlekettik organdardyń, ákimderdiń, máslıhattardyń tıimdi jumys isteýine tikele baılanysty. Sonyń aıasynda oblys ákimderin taǵaıyndaý protsesi ózgerip jatqanyn bilesizder. Prezıenttiń usynysy boıynsha, Konstıtýtsııaǵa usynylǵan ózgerister qabyldansa, oblytar men respýblıkalyq mańyzy bar qalalardyń ákimderi máslıhat depýtattary saılaǵan kezde Prezıdent mindetti túrde eki adamnyń kandıdatýrasyn usynady. Muny endi týra saılaý dep aıtýǵa bolmaıtyn shyǵar. Biraq saılaý protsesteriniń elementteri engizilip, jańasha taǵaıyndaý mehanızmi usynylyp otyr. Sondyqtan bul mehanızmniń negizgi maǵynasy – halyqtyń pikirin eskerý», - dedi Senat tóraǵasy.

Aıta keteıik, búgin «Evrazııa» arnasynda saǵat 10:00-de, «Habar» - 12:45-te, «Qazaqstan» - 16:05-te, «Qazaq TV» - 20:15-te, «Almaty»- 20:35-te referendým týraly derekti fılm kórsetilip jatyr.