Referendýmda jas býynnyń azamattyq kemeldengeni seziledi – UQShU baıqaýshylary

NUR-SULTAN. QazAqparat – Ujymdyq qaýipsizdik týraly shart uıymy Parlamenttik Assambleıasynyń baıqaýshylary Qazaqstandaǵy referendým ýchaskelerin aralady, dep habarlaıdy QazAqparat tilshisi.

«Búgin tańerteń bizdiń jumys tobymyz daýys berý ýchaskesine keldi. Bul naýqannyń joǵary deńgeıde uıymdastyrylǵanyn, halyqtyń belsendi kelýin, aǵa býynnyń da, jas urpaqtyń da patrıottyq minezin baıqaǵanymyzdy aıtqym keledi. Túske deıin negizinen egde jastaǵy halyq daýys berdi, jastar saǵat 10 – 11-den keıin belsendi kele bastady (...) Odan bólek, jas býynnyń azamattyq jáne saıası kemeldenýi seziletinin atap ótkim keledi», - dedi toptyń úılestirýshisi, Tájikstan Májilisiniń depýtaty Barotzoda Barot Faızýllo Nur-Sultanda ótken baspasóz máslıhatynda.

Onyń aıtýynsha, barlyq referendým ýchaskelerinde buryn prezıdenttik jáne parlamenttik saılaýǵa qatysqan tájirıbeli mamandar jumys istep jatyr.

Buǵan deıin Halyqaralyq Túrki akademııasynyń baıqaýshylary Qazaqstandaǵy referendýmdy joǵary qyzyǵýshylyqpen baqylap otyrǵandaryn aıtqan edi. Olar tańǵy 7-den beri referendým ýchaskelerin aralap júr.

Sonymen birge Qyrǵyzstannan Qazaqstanǵa 15 halyqaralyq baıqaýshy keldi. Olar Nur-Sultan men Almaty qalalarynda, Jambyl jáne Almaty oblystarynda jumys istep jatyr.

Jalpy Ortalyq referendým komıssııasy halyqaralyq uıymdar men shet memleketterden 272 ókildi baıqaýshy retinde akkredıttegen.