Referendým: Túrki memleketteri uıymynyń baıqaýshylary kezdeısoq tańdalǵan 17 ýchaskege bardy

<p>ASTANA. KAZINFORM &ndash; Túrki memleketteriniń uıymy baıqaýshylar mıssııasy referendým kúni kezdeısoq tańdalǵan 17 ýchaskege bardy. Bul týraly mıssııa basshysy, Túrki memleketteriniń uıymy Bas hatshysynyń orynbasary Sadı Djafarov aıtyp berdi.&nbsp;</p>

«Biz 17 ýchaskeniń barlyǵynda qajetti aqparat, referendýmǵa qatysty materıaldar berilgenin kórdik. Sondaı-aq, komıssııa qatysýshylary barlyq is-sharalardyń ashyqtyǵyn qamtamasyz etýge járdemdesýde. Biz monıtorıngke tolyq qol jetkize aldyq jáne osy ýaqytqa deıin saılaý komıssııalarynyń qyzmetine ákimshilik nemese quqyq qorǵaý organdary tarapynan zańsyz aralasý jaǵdaılaryn baıqamadyq», - dedi Sadı Djafarov Astanada Halyqaralyq baıqaýshylarǵa qolǵabys kórsetý ortalyǵynda ótken brıfıngte.

Spıker baıqaýshylar mıssııasynyń ýchaskelerdegi saılaý komıssııasy múshelerinen barlyq qajetti aqparatty ala alǵanyn atap ótti.

Mıssııa óz jumysyn kún sońyna deıin jalǵastyrady, sonymen qatar búgin keshke saılaý ýchaskeleriniń birinde daýystardy sanaý protsesine qatysady.

Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys berip jatyr.

Respýblıkalyq referendým bıýlleteninde bir ǵana saýal bolady:
— Siz Qazaqstanda atom elektr stantsııasyn salýǵa kelisesiz be?
Daýys berýshi jaýaptyń eki nusqasynyń birin tańdaıdy:
— «Iá, kelisemin» nemese, «Joq, kelispeımin».

Aıta keteıik, saǵat 16:00-degi jaǵdaı boıynsha 7 062 358 azamat bıýlleten aldy. Bul tizimge engizilgen azamattardyń 57,68 paıyzyn quraıdy.