Referendým: Pavlodarlyq metallýrgter óz tańdaýyn jasady

<p>PAVLODAR. KAZINFORM - Pavlodarlyq metallýrgter referendýmda daýys berip jatyr. Turǵylyqty jerleri negizinen Zelenstroı shaǵyn aýdany bolǵandyqtan, №90 jáne №127 referendým ýchaskelerinde daýys berýshilerdiń denin kenshiler qurady.</p>

Pavlodar qalasyndaǵy metallýrgter búgin ala tańnan shubyryp, óz referendým ýchaskelerine baryp jatyr. El ekonomıkasyn damytyp, ishki jáne syrtqy naryqty qanatty metalmen qamtamasyz etip turǵan kenshilerdiń referendýmǵa mańyzben qaraıtyndary baıqaldy.

Foto: Kazinform/Murat Aıaǵan

№127 referendým ýchaskesiniń tóraǵasy Aıymgúl Ahmetjanovanyń aıtýynsha, bul ýchaskede jalpy sany 2400 adam daýys beredi.

- Ýchaskemiz ashylǵan sátten jurtshylyq úzbeı kelip jatyr. Kópshiliktiń kóńil kúıleri joǵary, jalpy daýys berý úrdisi oıdaǵydaı órbýde. Ásirese, alıýmınıı jáne elektrolız zaýyttarynyń qyzmetkerleri belsendilik tanytyp jatqandary baıqalady. Bizdiń ýchaskedegi daýys berýshilerdiń 50-60 paıyzy atalǵan kásiporyndarda eńbek etedi. Bireýi túngi aýysymnan shyqsa, endi biri jumysqa úlgerý úshin ala tańnan daýys berip úlgerýge tyrysty. Qazirgi sátte jalpy daýys berýshilerdiń 20 paıyzdaıy kelip úlgerdi deýge bolady. Buǵan qosa 18 jasqa endi tolǵan 5 adam tirkelgen, - dedi ýchaske tóraǵasy Aıymgúl Ahmetjanova.

Foto: Kazinform/Murat Aıaǵan

Jergilikti kásiporynda taý-ken isiniń sarapshysy bolyp eńbek etetin Erkebulan Erbosynov AES qurylysy boıynsha respýblıkalyq referendýmdy ulttyq deńgeıdegi is-shara dep tanıtynyn jetkizdi. 

«Bul – halyqtyń tańdaýy. Memleket ishinde alaýyzdyq bolmaıtyndaı, kóptiń qalaýyna oraı jasalyp otyrǵan saıası ári qoǵamdyq is-shara dep uǵyndym. Ekonomıkalyq turǵydan da mańyzdy. Jasym 31-de, taý-ken isindegi sarapshylyqpen shuǵyldanamyn. Bizdiń zaýytta alıýmınıı úshin qajetti glınozem óndirilse, ol ári qaraı elektrolız zaýytyna jiberilip, daıyn metall kúıinde shyǵady. Aǵam da osy salada, taý-ken marksheıderi», - dedi metallýrg.

Zelenstroı shaǵyn aýdanyndaǵy №90 referendým ýchaskesinde de daýys berý úrdisi oıdaǵydaı júrip jatqany baıqaldy. Ýchaskelik komıssııa tóraǵasy Aqmaral Tursynova shaǵyn aýdan sońǵy jyldary ósip kele jatqanyn baıandady. Mundaǵy daýys berýshilerdiń deni – jergilikti ulttan. Kóbi qaladaǵy kásiporyndarda eńbek etedi. Ýchaskege tirkelgen 2499 adamnyń beseýi úıden daýys berýge ótinim jasaǵan. Qazirgi sátte kópshiliktiń belsendiligi joǵary ekenin atap ótti.

Eske sala keteıik, Pavlodar oblysynda 505 myńnan astam azamat óz tańdaýyn jasaıdy.