Referendým ótkenshe AES tehnologııasyn tańdamaımyz – mınıstr

<p>Energetıka mınıstri Almasadam Sátqalıev Almatyda BAQ ókilderimen ótip jatqan brıfıngide AES salý jóninde pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Ózderińiz biletindeı, Memleket basshysy AES salý qajet bolǵan jaǵdaıda qazaqstandyqtardyń kópshiliginiń pikirin bilý kerektigi týraly bastama kóterip, tapsyrma berdi. Bul jumys Referendým týraly konstıtýtsııalyq zań aıasynda júrip jatyr. Biz Energetıka mınıstrligi tarapynan osy júrgizilip jatqan jumysqa qajetti sarapshylyq qoldaý kórsetip otyrmyz. Men buǵan deıin de venderlerdiń (AES tehnologııasy men qurylysyn usynatyn kompanııalar — red) ótinimin ázirge qaramaıtynymyzdy habarlaǵanmyn. Qazir olarmen tek konsýltatsııa ǵana júrgizemiz. Ázirge tehnologııany tańdap jatqan joqpyz. ıAǵnı, bizge referendýmnyń qorytyndysyn bilý óte mańyzdy», — dedi mınıstr.

Sondaı-aq, ol referendým qorytyndysy belgili bolǵanǵa deıin oqıǵanyń aldyna túsip, asyqtyrýdyń máni joq ekenin aıtty. 

«Óıtkeni qazir basty másele — qazaqstandyqtar arasynda atom energetıkasynyń biz úshin qanshalyq mańyzdy ekenin, sonyń arqasynda ashylatyn múmkindikterdi — jumys oryndary ashylyp, ınjenerııa, joǵary bilim men orta tehnıkalyq bilimniń damıtynyn túsindirý bolyp tur. Joǵary dáldikti qurylǵy qurastyrý salasy tipti tutas ındýstrııany damytýdyń jańa draıverine aınalýy múmkin», — dedi Almasadam Sátqalıev.