Referendým kúninde koronavırýstyń taralýynyń aldyn alý algorıtmi bekitildi

NUR-SULTAN. QazAqparat – Respýblıkalyq referendým ótetin kúnde COVID-19 koronavırýs ınfektsııasynyń taralýyna jol bermeý algorıtmi bekitildi, dep habarlaıdy QazAqparat tilshisi.

QR Densaýlyq saqtaý vıtse-mınıstri – Bas memlekettik sanıtarııalyq dáriger Aıjan Esmaǵambetovanyń jańa qaýlysyna sáıkes, referendýmdy ótkizý kezinde:

1) adamdardyń kóp jınalýyna jol bermeı, áleýmettik qashyqtyqty saqtaýdy qamtamasyz ete otyryp, referendýmǵa qatysýshylardyń legin retteýdi;

2) úı-jaılarda jeldetkish/aýa baptaý júıeleriniń úzilissiz jumys isteýin;

3) aýany jasandy jeldetý júıesi bolmaǵan jaǵdaıda úı-jaılardy júıeli jeldetýdi;

4) daýys berý aldynda jáne kúni boıy qajettiligine qaraı úı-jaılardy jeldetýdi;

5) daýys berý aldynda jáne kúni boıy qajettiligine qaraı úı-jaılardy jýý quraldaryn qoldana otyryp tazalaý, ylǵaldy jınaý, dezınfektsııa júrgizýdi qamtamasyz etý qajet.

Atalǵan qaýlynyń oryndalýyn oblystardyń, respýblıkalyq mańyzy bar qalalardyń jáne astananyń ákimderi, bas memlekettik sanıtarııalyq dárigerleri, aýmaqtyq referendým komıssııalary qamtamasyz etýi tıis.

Aıta keteıik, Ortalyq saılaý komıssııasy 5 maýsymda ótetin respýblıkalyq referendým komıssııalarynyń qyzmeti týraly qaýly qabyldady. Úgitteý jumystary referendým taǵaıyndalǵan sátte bastalyp, daýys berýdiń aıaqtalýyna bir kún qalǵanda, ıaǵnı 2022 jyly 4 maýsymda saǵat 00-00-de aıaqtalady.

Oblystardyń, Nur-Sultan, Almaty, Shymkent qalalary ákimdikteriniń, respýblıka boıynsha jergilikti atqarýshy organdardyń ókilderi usynǵan málimetter men esepterge sáıkes, daýys berýshilerdiń tizimine 11 722 536 adam engizildi.