Referendým kezinde epıdahýal nasharlasa Ashyq qoldanylady
Bul týraly QR Bas memlekettik sanıtar dárigeri, Densaýlyq saqtaý vıtse-mınıstri Aıjan Esmaǵambetova Ortalyq saılaý komıssııasyndaǵy otyrysta aıtty.
«Referendýmnyń 5 maýsymda, ıaǵnı bir aıdan keıin ótetinin eskerip, sol kúni bas memlekettik sanıtar dárigerdiń koronavırýs ınfektsııasynyń aldyn alý sharalary týraly jeke qaýlysy shyǵatyn boldy. Árıne, bul eldegi jáne óńirlerdegi epıdemıologııalyq jaǵdaıdyń qalaı órbıtinine baılanysty bolady», - dedi Aıjan Esmaǵambetova.
Onyń aıtýynsha, epıdemıologııalyq ahýal qolaıly bolǵan jaǵdaıda da úgit-nasıhat kezinde qaýipsizdik sharalary saqtalýy kerek.
«Eger epıdemıologııalyq jaǵdaı kúrdelene tússe, qosymsha karantın sharalary engiziledi, ıaǵnı vaktsına nemese revaktsına alǵan aýmaqtyq referendým komıssııasy músheleri ǵana saılaý ýchaskelerine jiberiledi. Epıdjaǵdaıdyń asqynýy kezindegi taǵy bir qosymsha shara – ýchaskede Ashyq jobasyn mindetti túrde paıdalaný. Infektsııa juqtyrǵan adamdar ýchaskelerge kirgizilmeıdi», - dedi bas sanıtar dáriger.
Aıta keteıik, Ortalyq saılaý komıssııasy 5 maýsymda ótetin respýblıkalyq referendým komıssııalarynyń qyzmeti týraly qaýly qabyldady.
Úgit jumystary referendým taǵaıyndalǵannan sátte bastalyp, daýys berýdiń aıaqtalýyna bir kún qalǵanda, ıaǵnı 2022 jyly 4 maýsymda saǵat 00.00-de aıaqtalady.