Referendým azamattyq qoǵam men zań shyǵarýshy organdardyń damýyna yqpal etedi - sarapshy

NUR-SULTAN. QazAqparat – Referendým azamattyq qoǵam men zań shyǵarýshy organdardyń damýyna yqpal etedi. Bul týraly QR Prezıdenti janyndaǵy Qazaqstan strategııalyq zertteýler ınstıtýtynyń bólim meńgerýshisi Ermek Toqtarov málim etti, dep habarlaıdy QazAqparat tilshisi.

«Referendým mańyzdy oqıǵa ekenin eskersek, bul rette elimizdiń saıası mádenıetiniń damýynyń belgisi dep aıtýǵa bolady. Bizde zańnama boıynsha referendýmǵa erikti túrde qatysý eskerilgen. Sondyqtan el halqyn referendýmǵa shaqyryp, jumyldyrý óte mańyzdy dep bilemin», - dedi E. Toqtarov Ortalyq kommýnıkatsııalar qyzmetinde.

Onyń aıtýynsha, qazirgi reformalar Prezıdent bastamalarynyń jalǵasy bolyp otyr. Bul turǵyda osy reformalar keshendi baǵdarlamaǵa aınalyp, Konstıtýtsııa deńgeıinde damyp keledi.

«Jańa Qazaqstan qurý jolynda saıası júıede, onyń quqyqtyq negizinde ózgerister kerek. Birinshiden, azamattyq qoǵamnyń jáne zań shyǵarýshy organdardyń damýy jaǵynan qarasaq, túrli kózqarastardyń belsendiligin ári básekelestigin damytady», - dedi sarapshy. Sonymen qatar ol referendým men saılaýdyń aıyrmashylyǵy bar ekenin aıta kele: «eger saılaýda naqty bir saıası partııaǵa nemese kandıdatqa daýys bersek, al referendýmda mańyzdy sheshimge qatysty ustanymdy bildiremiz. Osy oraıda biz osy is-sharaǵa qatysýǵa mindettimiz dep sanaımyn. Óıtkeni elimiz úshin jáne saıası júıeniń damýyna eleýli áser etetin sheshim bolady. Tirkelgen turǵylyqty jer boıynsha saılaý ýchaskelerine barý kerek», - dedi ol.

Budan buryn habarlanǵandaı, Qazaqstanda 10 013 referendým ýchaskesi iske qosylady.

Ortalyq referendým komıssııasy bıýlletenderdi daıyndaýǵa qatysty qaýly qabyldady.