Reanımatsııada jatqandardyń 95 paıyzy vaktsına almaǵandar – Alekseı Tsoı
«Aýrý juqtyrý derekterin taldaý jumystary vırýs juqtyrǵandar men koronavırýsty aýyr ótkerip jatqan naýqastardyń negizgi úlesi vaktsına almaǵandarǵa tıesili ekenin kórsetti. 1 aqpannan beri koronavırýs juqtyrǵandardyń jalpy sanynda vaktsına almaǵan naýqastardyń úles salmaǵy 97,5 paıyz bolǵan. Al vaktsına alǵandardyń úlesi 2,5 ǵana. Kornavırýs ınfektsııasyn aýyr ótkerip jatqandar boıynsha da jaǵdaı osyǵan uqsas. Reanımatsııada jatqandar men ókpeni jasandy jeldetý qurylǵysyna jalǵanǵandardyń 95 paıyzy vaktsına almaǵan adamdar. Osy aıtylǵan derekter vaktsınalaýdyń tıimdi ekenin taǵy da áıgilep tur», - dedi mınıstr.
Sondaı-aq ol, vaktsına alý máselesin keıinge shegerip júrgen adamdarǵa úndeý tastady.
«Osyǵan baılanysty taǵy da halyqqa aıtqym keledi. Osy kúnge deıin vaktsına almaǵan azamattardy vaktsına boıynsha durys sheshim qabyldap, ekpe alýǵa shaqyramyn. Bul bárimizge densaýlyǵymyzdy saqtap qana qalmaı, jaqyndarymyzdyń amandyǵyna da kepil bolady», - dedi Alekseı Tsoı.
Sondaı-aq, ol Úkimet otyrysynda el aýmaǵyndaǵy ekpe pýnktterinde koronavırýs vaktsınasynyń qansha dozasy bar ekenin aıtqan bolatyn.
«Barlyq ekpe pýnktterinde birinshi komponenttiń 1,4 mln dozasy, ekinshi komponenttiń 940 myń dozasy bar. Jetkizý keste boıynsha jalǵasyp jatyr», - dedi Alekseı Tsoı.