«RBK» banki klıentteri aldyndaǵy mindetterdi oryndaýǵa ázir
2017 jyldyń 7 qarashasy kúni Ulttyq bank, QR Úkimeti men RBK banki arasynda banktiń tólem qabiletin qalpyna keltirý úshin ony kezeń-kezeńmen saýyqtyrýǵa baılanysty kelisim jasalǵan bolatyn. Baspasóz maslıhatynda aktsıoner Vladımır Kım men RBK banki dırektorlar keńesiniń tóraǵasy Torsten Pol jol kartasy ázirlenip, júzege asa bastaǵanyn aıtty.
«Biz 60 mlrd teńgeni aldyq. 19 qańtarǵa deıin taǵy 100 mlrd teńge alamyz. Búgingi tańda saýyqtyrýǵa baılanysty Ulttyq bankten 120 mlrd teńge kóleminde, ınvestordan 160 mlrd teńge aldyq. 2018 jyldyń 19 qańtaryna deıin 203 mlrd teńge beriledi, barlyǵy 363 mlrd teńge bolady. Bul bizdiń mindetterimizdi ótep jatqanymyzdy kórsetedi, klıentterimiz qarajattaryn ala alady. Biraq biz ár klıentti alyp qalý úshin «kúresetin» bolamyz. Bank ballansy tazarǵannan keıin, Qazaqstan naryǵynda eń úzdikterdiń biri bolatynyna senińizder. «Qazaqmys Holdıngi» kompanııasy endi menedjmentti qatań qadaǵalaıdy ári klıentterimiz bizdiń strategııalarymyzdyń ortasynda bolady»,- dedi Torsten Pol.
Buǵan deıin habarlanǵandaı, bankke jańa ınvestor retinde «Qazaqmys Holdıngi» kompanııasy prezıdenti Vladımır Kım keldi.
«Búginde bakntiń quny 0 teńge. Biz eki apta boıy aýdıtorlarmen jumys istedik. Sosyn Kım aktsıoner retinde kiredi dep sheshtik. Osydan keıin, «Qazaqmys» Holdıngi» banktiń jalǵyz aktsıoneri bolady. Qazir kompanııa 90 paıyz kapıtaldyń ıesi. 100 mlrd teńge 19 qańtarǵa deıin berilip, «Qazaqmys» Holdıngi» onyń 99 paıyzyna ıe bolady. Buǵan deıin bankte Qazaqmystyń esepshoty bolǵan. Osynyń bárin eskere kele 1995 jyly mys óndirisin saýqtyrǵandaı, bankti de saýyqtyrý qajet degen sheshimge keldik», - dedi Vladımır Kım.