Raıymbek Batalov agrarlyq sýbsıdııalar tóńiregindegi jemqorlyq daýlaryna pikir bildirdi
Palatanyń aqparat alańynda ótken tikeleı efırde Raıymbek Batalov Ýkraına men reseı arasyndaǵy jaǵdaı kásipkerlerge qandaı táýekel týyndatyp jatqanyn aıtty.
«Osy aıdyń aldaǵy aptasynda strategııany jarııalaımyz. Valıýta baǵamyna baılanysty, tasymal boıynsha qıyndyqqa tap bolyp jatqandar bar. Kóp kásipkerlerdiń tasymal tizbegi buzylyp jatady. Taýar óndirisine qajet quramdas bólik nemese shıkizat jetpeı qalsa, taýar jetkizý tizbegi úziledi. Saldarynan taýarsyz qalýǵa bolady nemese óndiris ýaqytsha toqtap qalady.
Importtyq mindettemeler boıynsha táýekelder bar. Biz qoldaýdyń ótemdik sharalaryn qatar pysyqtap jatyrmyz. Biraq bul ońaı emes, óıtkeni bıýdjettiń de túbi bar», - dedi palata basshysy.
Sondaı-aq, ol fermerlerden egis naýqanyna qatysty saýaldar kóp túsip jatqanyn aıtty.
«Kúıip turǵan máseleler bar. Palatanyń ustanymy mynadaı: sýbsıdııalaý tártibin byltyrǵydaı qaldyrý kerek dep otyrmyz. Bıyl sharttar men somalardy ózgertpeımiz. Sonymen qatar, biz egis naýqanyna qoldaýdyń kólemin ulǵaıtýdy suraımyz. Búgingi tańda munaı baǵasy barreline 100 dollardan joǵary. Metaldardyń baǵasy da qymbat. Sondyqtan fermerler men taýar óndirýshilerdi qoldaý úshin sýbsıdııany qysqartý durys bolmaıdy dep esepteımiz.
900-den astam qylmystyq is qozǵalǵany túsinikti (aýyl sharýashylyǵyndaǵy sýbsıdııalaý boıynsha –red.). Biraq bul jerde másele sharýalarǵa emes, sýbsıdııalardy ákimshilendirý isine, Aýyl sharýashylyǵy mınıstrligine qatysty. Sharýalardyń qatysy joq. Qazir naýryz aıy. Bolary bolyp, boıaýy sińgen soń máseleni sheshý taǵy durys emes dep esepteımiz. Kóbi sýbsıdııany bıylǵy jyldyń bıýdjetine salyp qoıdy. Byltyrdan beri tıisti sýbsıdııasyn almaǵandar bar. Osy isti jyldamdatý kerek dep jatyrmyz. Onyń óz protsedýrasy bar ekeni túsinikti. Biraq ony da jyldamdatý qajet», - dedi Raıymbek Batalov.