Raýan Kenjehanuly: Joldaýdaǵy máseleler tolyq júzege assa - memleketke úlken tabys
«Kezekti Joldaýdyń erekshelegi, onda Elbasy búginge deıin ár salada qordalanǵan máselelerdi jan-jaqty aıtyp, olardyń árqaısysynyń sheshý joldaryn da kórsetti. Meniń oıymsha, tıimdi jumys isteý tetikterin búge-shigesine deıin talqylap, soǵan basa nazar aýdarýy - Úkimettiń, ákimdikterdiń, quqyq qorǵaý organdarynyń jumystaryn odan ári jetildire túsýge septigin tıgizedi. Sosyn Elbasy sapaly bilim berýdiń alǵashqy qadamy balabaqshadan bastalý kerektigine de nazar aýdardy. Osynyń ózinde úlken eldik maqsat-murattar bar. Al bilim men ǵylymǵa bólinetin aqsha ishki jalpy ónimniń on protsentine deıin ósirýdi tapsyrý arqyly Nursultan Nazarbaev bolashaq ǵylymda ekenin kórsetip berdi», - deıdi Raýan Kenjehanuly.
Sondaı-aq, ol Elbasynyń kelesi jyldy «Jastar jyly» dep jarııalaý týraly bastamasyna toqtala kele, onyń da Joldaýdaǵy tapsyrmalarmen tikeleı baılanysty ekenin alǵa tartty. Bul rette Raýan Kenjehanuly Joldaýda aıtylǵan máseleler tolyǵymen sheshilip, júzege assa, ol memleket úshin úlken tabys bolatynyn atap ótedi.
«Jastar jyly» jastarǵa baılanysty sharalar tek bir ret ótip, umyt bolatyn jıyndar emes, kerisinshe keshendi jobalar bolýy kerek. Elbasy ózi usynǵan jańa gýmanıtarlyq baǵyt sııaqty uzaq merzimdi jobalar jalǵasyn tapsa dep oılaımyn. Bul jastardyń biliktiligin arttyrýda erekshe paıdaly bolar edi. Bilim-ǵylymǵa qyzyǵýshylyǵy úlken jastardy qoldaý qazir mańyzdy. Óıtkeni medıtsına, ekonomıka, rýhanııat, tehnıka salalarynyń basty jetistikterin ǵalymdar jasaıdy. Al halyq sony paıdalanady. Sondyqtan keler jyly jastarǵa arnalǵan jemisti jobalar bastalady degen nıettemin», - dedi R. Kenjehanuly.