Raýan Kenjehanuly: Pandemııanyń talaptaryna shuǵyl beıimdelip, aýdıtorııa úshin kúresýge májbúrmiz

NUR-SULTAN. QazAqparat – Pandemııanyń talaptaryna tez beıimdelip, jańa kontent, jańa tehnologııa múmkindikterin qosyp, aýdıtorııa úshin kúresýge májbúrmiz. Astana Media Week - 2020 sharasynyń «Mýltıplatformalylyq» taqyrybyndaǵy plenarlyq sessııasynda «Bilim Media Group» kompanııasynyń dırektory Raýan Kenjehanuly osylaı aıtty, dep habarlaıdy QazAqparat tilshisi.

Kompanııa basshysynyń aıtýynsha, mundaı kúres tez ózgerýdi talap etedi. «Kishkentaı ǵana mysal: ózderińiz jaqsy biletindeı karantın sharalaryna baılanysty bıylǵy jyldyń naýryz –sáýir aılarynan bastap álem boıynsha 1,6 mlrd oqýshy qashyqtan oqytý formatyna kóshti. Bizdiń elde de solaı boldy. Buǵan Qazaqstan da, sol sekildi basqa da memleketter daıyn bolǵan joq. Óıtkeni mundaı kólemde qashyqtan oqytýǵa daıyn birde-bir platforma, birde-bir kompanııa da, memleket te bolǵan emes», - dedi Raýan Kenjehanuly.

«Bilim Media Group» kompanııasynyń dırektorynyń aıtýynsha, buǵan deıin bilim berý salasyndaǵy aqparattandyrý quraldary, platformalary jasalyp jatqanymen olar mektep muǵalimderine kómekshi qural retinde ǵana bolǵan.

«Osyndaı jaǵdaıda shuǵyl daıyndyq jasap, múlde bólek tehnologııalyq quraldardy ıgerip, jańa kontent jasaý arqyly buǵan deıin meńgerilmegen deńgeılerge shyǵýǵa múmkindik aldyq. Sebebi biz qurastyryp jatqan platformalarǵa kún saıyn 1,5 mln adam kirip otyr. Mundaı trafıgi bar Qazaqstanda júıe joq deýge bolady. Qazaqstandyq ınternet trafıkti ólsheýshiler men zertteýshilerdiń bergen málimeti boıynsha 30 jyldyq tarıhymyzǵa mundaı trafık bolǵan emes», - dedi ol.

Raýan Kenjehanuly óz sózinde mundaı trafık bir jaǵynan úlken múmkindik bolǵanymen, ekinshi jaǵynan óte úlken talap ekenin de eske saldy.

«Biz tez beıimdele alýymyz kerek. Biz veb-saıttyń mobıldi nusqasyn shuǵyl damytýǵa májbúr boldyq. Sebebi 1,5 mıllıon adamnyń 80 paıyzy mobıldi telefondar arqyly kiredi. Qazir balalardyń da, muǵalimderdiń de qolynda smartfon bar. Odan bólek ózimizge ǵana táýeldi bolmaı, YouTube sekildi platformalardyń múmkindigin keńinen paıdalaný úshin biz biraz kontentti sonda salyp, onyń da múmkindigin kóreıik degen tájirıbelerdi engizdik. Bul da óte qyzyq boldy, sebebi qazaq tilindegi sabaqtardy kórsetetin YouTube-arnaǵa 7 kúnniń ishinde 100 myń adam jazylyp, turaqty túrde kóre bastady», - dedi Raýan Kenjehanuly.

Aıta ketsek, eloradada Astana Media Week 2020 sharasy ótkizilýde. Іs-sharanyń negizgi maqsaty – otandyq medıasalany damytý men ındýstrııadaǵy iskerlik qarym-qatynasty aımaqtyq jáne halyqaralyq deńgeıde ilgeriletý. Medıa aptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jınap keledi jáne ózekti taqyryptar talqylanady.