Raýan Kenjehanuly: «Ańsaǵan sábı» baǵdarlamasy – ıgi bastama

ALMATY. QazAqparat – «Ulttyq aýdarma bıýrosy» qoǵamdyq qorynyń atqarýshy dırektory Raýan Kenjehanuly Prezıdent Qasym-Jomart Toqaevtyń Qazaqstan halqyna Joldaýyna qatysty pikir bildirdi, dep habarlaıdy QazAqparat tilshisi.

«Biz búgingi Joldaýdy asyǵa kúttik. Sebebi, qazirgi qalyptasqan jaǵdaı memleketten aıqyn jospar men belsendi áreketti talap etedi. Búgingi Joldaýda sol jospar men árekettiń naqty baǵyttaryn estidik. Endi osy baǵytta bárimiz judyryqtaı jumylyp jumys isteýimiz kerek», – deıdi Raýan Kenjehanuly.

Sonymen qatar, ol kásipkerlikti qoldaý - kezek kútirmeıtin másele ekenin atap ótti.

«Kásipkerlerdi sýbsıdııa arqyly yntalandyrý - óte durys sheshim. Salyqty qaıta qaraý máselesi de kóterildi. Ǵımaratty jalǵa alyp otyrǵan shaǵyn jáne orta bıznes ókilderine de jeńildik qarastyrý kerektigi aıtyldy. Ony da qoldaımyn. Óıtkeni, pandemııa dál osy salaǵa salmaq túsirdi. Sondaı-aq, Joldaýda kásipkerlerdiń jańa býynyn ósirý týraly sóz qozǵaldy. Bul bizdiń naryqqa aýadaı qajet. Sebebi, kásipkerler ortasy jasarmaı jáne jańa kúsh kelmeı bul saladan ózgeris kúte almaısyń. Jalpy, kásipkerlikti qoldaý - kezek kúttirmeıtin másele»,– dep atap ótti ol.

Raýan Kenjehanuly Joldaýda aıtylǵan demografııalyq ósimge qatysty da oı qosty.

«Bizdiń eldegi demografııalyq ósimge qaıtadan den qoıyldy. Prezıdenttiń aıtqan «Ańsaǵan sábı» baǵdarlamasy - óte oryndy jáne ıgi bastama»,– dep qortyndylady oıyn Raýan Kenjehanuly.