Rasýl Rysmambetov: Úkimet úsh jyldyq bıýdjet arqyly adamdarǵa ınvestıtsııa salyp otyr
«Bul jerde Úkimettiń jospary bar da, naqty faktiler bar. Osy turǵydan alsaq, Úkimettiń josparyn jaqsy deýge bolady. Óıtkeni úsh jyldyq bıýdjettiń shyǵys bóliginde áleýmettik baǵdardaǵy shyǵyndardyń aýqymy aıtarlyqtaı keńeıtilgen. Bilim berý granttarynyń, medıtsına sapasyn jaqsartýǵa bólinetin shyǵyndardyń keńeıgenin kórip otyrmyn. Áleýmettik baǵyttaǵy shyǵyndardyń kólemi 10 trln teńgeden asatyn shyǵar dep oılaımyn... Sondyqtan aldaǵy úsh jyldan qazaqstandyqtar áleýmettik qoldaýdyń artýyn kúte alady», - dedi sarapshy.
Qarjyger Úkimettiń bul ustanymyn azamattarǵa salynǵan ınvestıtsııa dep baǵalaýǵa bolatynyn aıtady.
«Óıtkeni medıtsına, bilim salalaryna bólingen aqsha bolashaqqa salynatyn ınvestıtsııanyń bir túri bolyp esepteledi. Áleýmettik turǵyda az qamtylǵan azamattarǵa qoldaý kúsheıe bermek. Aldaǵy úsh jyldan osy baǵyttaǵy ózgerister kútýge bolady dep esepteımin», - dedi Rasýl Rysmambetov.
Eske salaıyq, keshe Májilistiń jalpy otyrysynda «2025 – 2027 jyldarǵa arnalǵan respýblıkalyq bıýdjet týraly» Zań qabyldandy.
Qujatqa súıensek, densaýlyq saqtaý júıesine 2025-2027 jyldarǵa arnalǵan shyǵystar 7,6 trln teńgeni quraıdy, onyń ishinde bıylmen salystyrǵanda 180 mlrd teńgege ulǵaıyp, 2025 jylǵa 2,4 trln teńge qarastyrylǵan. Jalpy, 2025 jyly tegin medıtsınalyq kómektiń kepildik berilgen kólemine 1,6 trln teńge somasynda shyǵystar josparlandy. Áleýmettik medıtsınalyq saqtandyrý qoryna 675 mlrd teńge, onyń ishinde memlekettik jarnalarǵa 668 mlrd teńge kózdelgen.