Rashıd Aıýpov Túrkistannyń túrli sala mamandaryna Memlekettik týdy tabystady

TÚRKІSTAN. QazAqparat – Túrkistan qalasynyń ákimi Rashıd Aıýpov Táýelsizdiktiń 29 jyldyǵyna oraı oblys ortalyǵynda túrli salada qyzmet etip júrgen 29 azamatqa Memlekettik týdy tabystap, merekemen quttyqtady. Bul azamattardyń qatarynda qalanyń damýy men tynys-tirshiliginde orasan-zor eńbek etip júrgen jandar bar, dep habarlaıdy QazAqparat tilshisi.

Shahar basshysy «Túrkistan jaryq-tazalyq», «Jylý», «Túrkistan-Sý» mekemelerinde santehnık, ot jaǵýshy, júk artýshy, sypyrýshy, kúzetshi bolyp qyzmet etip júrgen azamattarǵa alǵys hatyn da qosa berdi. Odan ózge, ákimdiktiń derbes bólim basshylary bilim, dárihana, naýbaıhana, jedel medıtsınalyq járdem syndy mekeme mamandaryna tabystady.

Aıta keteıik, jýyq arada Memlekettik týdy paıdalaný aıasy zańnamalyq turǵyda keńeıtilgen edi. Elimiz Týyn jeke jáne zańdy tulǵalar ǵımarattarda, onyń ishinde balkondarda jáne saltanatty is-sharalar ótkiziletin oryndarda patrıottyq sezimderin, qazaqstandyq biregeıligin bildirý úshin, el azamattarynyń jetistikterin qoldaý maqsatynda paıdalana alady.