Rámizderdi nasıhattaý boıynsha usynystar ázirleý mańyzdy – Eltańba avtory

NUR-SULTAN. QazAqparat – Memlekettik rámizderdi, ulttyq qundylyqtardy nasıhattaýǵa tyń serpin berý kerek. Bul týraly elordada «Memlekettiliktiń rámizderi» atty halyqaralyq ǵylymı konferentsııada Qazaqstan Respýblıkasy Memlekettik Eltańbasynyń avtory, qoǵam qaıratkeri, belgili sáýletshi Jandarbek Málibekuly málim etti, dep habarlaıdy QazAqparat tilshisi.

«Eltańbamyzda myń jyldan beri kele jatqan rýhymyz, sanamyz jáne dástúrimiz, sondaı-aq Uly Dalanyń fılosofııasy qamtylǵan. 30 jyldan beri kók baıraǵymyz kókte jelbirep, árbir jetistigimiz kezinde joǵary kóterilip keledi. Ánuranymyz shyrqalǵan saıyn rýhymyz kóteriledi. Osy oraıda ulttyq qundylyqtarymyzdy tereń túsinip, oılanýymyz kerek», - dedi Jandarbek Málibekuly.

Sonymen qatar belgili sáýletshi Jańa Qazaqstan baǵdary aıasynda memlekettik rámizderdi, ulttyq qundylyqtardy nasıhattaýǵa tyń serpin berý kerek ekenin aıtty. Osy oraıda tıisti komıssııa quryp, rámizderdi nasıhattaý turǵysynda usynystar ázirleý mańyzdy bolyp tur.

«Jas urpaqqa balabaqshadan bastap, mektep, joǵary oqý ornynda oqytý kezinde basty qundylyqtardy nasıhattaýdyń qadamdaryn pysyqtaý kerek. Ár meıramda meniń Týym jelbirep, Eltańbam tórde tursa, Ánuranym shyrqalsa dep armandaımyn», - dedi Qazaqstan Respýblıkasy Memlekettik Eltańbasynyń avtory.

Budan buryn habarlanǵandaı, atalǵan halyqaralyq konferentsııada Memlekettik hatshy Erlan Qarınniń quttyqtaý hatynda ǵalymdar tarapynan memlekettik rámizderdi tıimdi nasıhattaýǵa jáne patrıottyq tárbıeniń tyń tásilderin jetildirýge qatysty irgeli zertteýler usynylýy kerek ekeni aıtylǵan.

Osy jyly naýryz aıynda Qazaqstan Respýblıkasy Memlekettik Eltańbasynyń avtory, qoǵam qaıratkeri, belgili sáýletshi Jandarbek Málibekuly 80 jasqa toldy. Prezıdent Qasym-Jomart Toqaev Jandarbek Málibekulynyń mereıtoıymen quttyqtap, jyly lebizi men izgi tilegin jetkizdi.

Osydan týra 30 jyl buryn, naqty aıtqanda 1992 jyldyń 4 maýsymynda QR Tuńǵysh Prezıdenti Nursultan Nazarbaev «Qazaqstan Respýblıkasynyń Memlekettik týy týraly», «Qazaqstan Respýblıkasynyń Memlekettik eltańbasy týraly» jáne «Qazaqstan Respýblıkasy Memlekettik ánuranynyń mýzykalyq redaktsııasy týraly» Zańdarǵa qol qoıǵan edi.

Al «Qazaqstan Respýblıkasynyń Memlekettik rámizderi týraly» Konstıtýtsııalyq Zań 2007 jyly 4 maýsymda qabyldandy. Osy Zańǵa sáıkes jyl saıyn 4 maýsym Qazaqstan Respýblıkasynda Memlekettik rámizder kúni retinde merekelenedi. Memlekettik rámizder – bul kez kelgen memlekettiń egemendigi men birtutastyǵyn beıneleıtin, onyń ajyramas atrıbýttarynyń biri.