Rámizder kúni: Túrkistanda «Meniń týym, meniń Otanym!» chellendji bastaldy
Búgin Túrkistan qalasynda 4 maýsym - Memlekettik rámizder kúnine oraı «Týǵan jerim meniń – Qazaqstanym» atty oblystyq patrıottar forýmy ótti.
Eldikti ulyqtaǵan sharaǵa eńbek ardagerleri, ulaǵatty ustazdar, sondaı-aq qoǵamdyq birlestikter men etnomádenı birlestikterdiń, jastar uıymdarynyń ókilderi qatysty.
Túrkistan oblysy qoǵamdyq damý basqarmasynyń basshysy Ańsar Óserbaev Rámizder kúniniń egemen elimiz úshin aıryqsha mereıli ári mańyzdy ekenin atap ótti.
«Memlekettik rámizder – ár memlekettiń táýelsizdigin bildirýmen qatar, tutastyqqa uıystyratyn, birlikke úndeıtin aıshyqty belgiler. Táýelsizdigimizdiń tumaryna aınalǵan memlekettik rámizderimiz bolashaqqa bastaǵan uly kóshimizdi demep, ıgi isterge uıystyra bersin! Árdaıym elimiz tynysh, halqymyz aman, týymyzdyń mártebesi bıik bolsyn!» – dedi Ańsar Óserbaev.
Forým aıasynda basqarma basshysy Rámizder kúnine jáne Túrkistan oblysynyń qurylǵanyna 5 jyl tolýyna oraı, óńirdiń damýyna ózderiniń úlesin qosyp júrgen birqatar azamattardy marapattady. Olardyń qatarynda bilim, sport, densaýlyq saqtaý, kásipkerlik, t.b. salalar boıynsha jetistikterge jetken, respýblıkalyq jáne halyqaralyq arenalarda elimizdiń týyn jelbiretken úzdikter bar.
Merekelik is-shara kontserttik baǵdarlamaǵa ulasty. Jalyndy jastardyń áýelete shyrqaǵan patrıottyq ánderi men sahnalyq qoıylymdary kórermen qaýymǵa kóterińki kóńil kúı syılady.
Shara sońynda oblys jastary «Meniń týym, meniń Otanym!» chellendjin aýdan qalalardaǵy zamandastaryna joldady. Onda Memlekettik Týdyń janynda turyp, rámizder jaıynda ornyqty oı aıtylýy shart.