Rámizder kúni: Óskemende tý men eltańba beınelengen alyp shar ushyryldy

ÓSKEMEN. QazAqparat – Shyǵys Qazaqstan oblysynda koronavırýs pandemııasyna baılanysty Memlekettik rámizder kúnine oraı 5 myńnan astam adam qamtylǵan is-sharalar onlaın ótkizildi, dep habarlaıdy QazAqparat tilshisi.

ShQO aqparat ortalyǵynyń málimetine súıensek, mereke qarsańynda Óskemen qalasyndaǵy mektep oqýshylary arasynda «Bul - meniń Týym!», «Bul - meniń Ánuranym!», «Bul - meniń Eltańbam!» taqyryptarynda esse jazý jáne sýret salý baıqaýy jarııalanǵan. Sondaı-aq shahar jastary «Meniń rámizderim - meniń maqtanyshym» ınternet-aktsııasy aıasynda Memlekettik rámiz fonynda túsken fotosýretterin áleýmettik jelige saldy.

Memlekettik rámizder kúni ánuran aıtýdan bastaldy. Osydan keıin Qazaqstan taýynyń bókterinen tý men eltańba beınelengen shar ushyryldy. Budan bólek, Ertis ózeniniń boıynda 40 týy bar qaıyq sherýi ótkizildi.

Al Semeıde patrıottyq ánderdiń onlaın-baıqaýy ótti. Aýdandarda «Meniń týym - meniń maqtanyshym» fleshmoby, Memlekettik rámizder kórmesi, onlaın-vıktorına uıymdastyrylyp, etnomádenı birlestik músheleri ázirlegen beınerolık kórsetildi.

Nur Otan partııasynyń «Meniń Týym, Meniń Otanym» atty aktsııasynyń aıasynda elimizdiń kók baıraǵy saýda ortalyqtary men oqý oryndaryna, alańdar men kóshelerge ilindi.

«Meniń týym» aktsııasy aıasynda kópqabatty úılerdiń balkondaryna 223 Memlekettik tý ornatyldy.