Ramazan aıynda 1,5 myńnan astam otbasyǵa azyq-túlik sebeti tapsyrylady

NUR-SULTAN. QazAqparat - Nur-Sultanda qasıetti Ramazan aıynda kómekke muqtaj otbasylarǵa azyq-túlik sebetin taratý jalǵasýda, dep habarlaıdy QazAqparat tilshisi.

Azyq-túlik jıyntyqtaryn taratýǵa QMDB, eriktiler jáne janashyr azamattar úlken kómek kórsetýde. Al azyq-túlik sebetterin jınaqtaý Áziret Sultan meshitinde júrgizildi, osy jerden elordanyń 4 aýdanyndaǵy muqtaj otbasylarǵa tasymaldandy.

«Búgin qasıetti Ramazan aıynda 1,5 myń azyq-túlik sebetin taratýdy bastadyq. Azyq-túlik jıyntyqtaryn jaǵdaıy tómen otbasylar alady, olardyń arasynda erekshe qajettiligi bar balalardy tárbıelep otyrǵan otbasylar, tolyq emes otbasylar, múgedek jandar, zeınetkerler, jetim balalar, kópbalaly analar jáne t.b. bar. Azyq-túlik jıyntyǵynda eń qajetti taýarlar bar: maı, un, kúrish, jarma, qaraqumyq, qant, shaı, tomat pastasy. Bir azyq-túlik sebetiniń salmaǵy – shamamen 20-25 kılogramm», - dedi «Astana jastary» jastar resýrstyq ortalyǵynyń volonteri Damır Aıtymov.

Aıta keteıik, bıyl Naýryz merekesi «Qaıyrymdy ister» marafonynyń aıasynda ótti. Naýryz aıynda azyq-túlik jıyntyǵyn myńnan astam muqtaj otbasy aldy. Qaıyrymdylyq qyzmetti júzege asyrýǵa kásipkerler, iri uıymdar, eriktiler jáne qala turǵyndary kómek kórsetedi.

«Saýaby mol is jasaý qashanda mańyzdy. Mundaı ıgi bastamalar kóbeıe beredi dep úmittenemiz. Qaıyrymdylyq sharalary kez kelgen adamnyń júregine jylý syılaıdy»,- dedi volonter.

Óz kezeginde sebet alýshylar uıymdastyrýshylarǵa jáne qaıyrymdylyq aktsııasyna qatysqandarǵa alǵystaryn bildirdi.

«Jyl saıyn osyndaı syılyq alyp turamyz. Bul bizge úlken járdem. Sebette qajetti tamaq ónimderiniń bári bar. Bizdi nazardan tys qaldyrmaı, qasıetti Ramazan aıynda osyndaı kómek kórsetkenderińiz úshin alǵysym sheksiz. Elimizde tek beıbitshilik bolsyn! Demeýshilerge, eriktilerge jáne ákimdikke raqmetimdi aıtamyn!» - dep bólisti Sapýra Baıǵýanova.

Azyq-túlik sebetin alǵandardyń biri – Nurgúl Aımaǵambetova erekshe qajettilikteri bar balanyń anasy. Ol elorda ákimdigine, metsenattar men eriktilerge alǵysyn bildirdi.

Aıta keteıik, jyl basynan beri elordanyń 10 myńnan astam turǵynyna jan-jaqty áleýmettik kómek kórsetildi.

Esterińizge sala keteıik, 2021 jyly «Qaıyrymdy ister» aıasynda muqtaj astanalyqtarǵa 15 myńnan astam azyq-túlik sebeti taratyldy.