Ramazan aıy: Túrkistan ımamdary jomart jandardy qaıyrymdylyqqa shaqyrdy
Jıynda Qazaqstan Musylmandary dinı basqarmasynyń Túrkistan oblysy boıynsha ókil ımamy Musabek Aqtamberdi qasıetti aıdaǵy saýapty amaldar týraly aıtty.
«Barshańyzdy múbárak Ramazan aıynyń kelýimen shyn júrekten quttyqtaımyn! Uly Jaratýshynyń pendelerine tartqan teńdessiz syıy - qasıetti Ramazan - sansyz sezimder men tolyp tasyǵan izgi oılardyń saltanat qurǵan, kún men tún de tutastaı Jasaǵan Iemizdiń raqymy men meıirimine tunǵan aı. Basqa ýaqytpen salystyrǵanda, jaqsylyqtar men saýaptardyń sansyz eselenip jazylar aıy da osy - Ramazan. Oraza adam janyn tazartyp, jaman qylyqtardan saqtaıdy», - dedi Túrkistan oblysynyń bas ımamy.
Musabek Aqtamberdi kásipker, janashyr azamattardy kómekke muqtaj jandarǵa qamqorlyq kórsetýge, qaıyrymdylyq jasaýǵa, jetim men jesirge meıirimdilik tanytyp, qaraýsyz qalǵan qarttarǵa kóńil bólýge shaqyrdy.
Túrkistan qalalyq «Hılýet» ortalyq meshitiniń bas ımamy Júsipbek Qasymbekov, Túrkistan qalalyq eńbek jáne soǵys ardagerler keńesiniń tóraǵasy Jarqynbek Qulbaımbetov jáne oblystyq aqsaqaldar alqasynyń tóraǵasy Jarylqasyn Áziretbergenov te baspasóz máslıhatynda jýrnalıster suraǵyna jaýap berdi. Sonymen qatar, qasıetti aıda tek iship-jeýden ǵana emes, ósek-ǵaıbat syndy jaman ádet-qylyqtardan aýlaq bolý jaıynda aıtyldy. Óıtkeni, oraza qulaq, kóz, aýyz kúnálarynan da saqtaný úshin ustalady. Sol úshin din ókilderiniń aıtýynsha, qulshylyq amaldarymyzdy kóbeıtip, kóbirek Allany eske alyp, jıirek Quran oqyǵan abzal.
Al zeket berý - jaǵdaıy kelgen (sharıǵat boıynsha nısap mólsherine jetken) musylmanǵa paryz. Bas ımam zeket berekeli Ramazan aıynda berilse, onyń da saýaby eselenip jazylatynyn aıtty.
Aıta keteıik, bıyl Ramazan aıy 6 mamyrda bastalady. QMDB orazanyń jáne namazdyń barlyq óńirler boıynsha kestesin jarııalady. Bıylǵy pitir-sadaqanyń kólemi - 300 teńge.