Ramazan aıy qarsańynda kókshetaýlyq 7 balanyń anasy pəterli boldy

KÓKShETAÝ. QazAqparat- Kókshetaýda alǵash ret «Jaramazan» atty rýhanı-mádenı shara ótti, dep habarlaıdy QazAqparat HAA tilshisi Aqmola oblysynyń «Naýan Hazret» atyndaǵy meshittiń resmı saıtyna silteme jasap.

Atalmysh meshittiń uıymdastyrýymen ótken sharaǵa QMDB tóraǵasynyń orynbasary, naıb múftı Baýyrjan Esmahan arnaıy kelip qatysty. Іs-sharada ımamdar Ramazan aıynyń qadir-qasıeti men orazanyń paıdasy jaıly baıandasa, aqyndar men jazýshylar asyl dinniń qundylyqtaryn jyrlady.

Sondaı-aq, bul sharada meshit janashyrlary alǵys hattarmen marapattaldy.

Al, ótken qysta órtten baýyrlaryn qutqaryp qalǵan 8 jasar Uldana Sovettiń otbasy men taǵy bir muqtaj januıaǵa balalar saýyqtyrý ortalyǵyna joldama berildi. 
 

Sonymen qatar, «Ǵalym» meshitiniń bas ımamy Nurlan Ábenulyna demeýshilerdiń kómegimen Umra qajylyǵyna joldama tabystaldy.

Al, bul keshtiń eń úlken tosynsyıy men erekshe syılyǵy Nurlykósh aýylynda 7 balasymen páter jaldap júrgen jalǵyzbasty ana Máýlengúl Tarbaqqyzyna 2 bólmeli páterdiń tartý etilgeni boldy.

"Mundaı aıryqsha qaıyrymdy is jınalǵandardy eriksiz tamsandyrdy. Kópbalaly otbasyna berilip otyrǵan baspana Krasnyı ıar kentinde ornalasqan. Páter meshit janyndaǵy «Zeket» qaıyrymdylyq qoryna jınalǵan qarajatqa satyp alyndy", dep jazylǵan meshit saıtynda.

Shara sońynda meshit ımamdary men uıymdastyrýshylar Máýlengúldiń jańa shańyraǵyna baryp quttyqtap, batasyn berdi.