Raqymshylyq: 5 kúdiktige qatysty qylmystyq qýdalaý toqtatyldy

ASTANA. QazAqparat – Qańtar oqıǵasy boıynsha 5 kúdiktige qatysty qylmystyq qýdalaý toqtatyldy. Bul týraly QR Bas prokýratýrasy Qylmystyq qýdalaý qyzmeti basshysynyń orynbasary Eldos Qılymjanov aıtty, dep habarlaıdy QazAqparat tilshisi.

«Aldyn ala málimetterge sáıkes, raqymshylyq sharasymen shamamen 1,5 myńǵa jýyq adam qamtylmaq. Bas prokýratýra jergilikti prokýrorlarǵa «Raqymshylyq jasaý» Zańynyń normalaryn birkelki qoldanylýyn jáne qatań zańdylyqty saqtaýdy qamtamasyz etý týraly tapsyrma berildi», - dedi E. Qılymjanov Ortalyq kommýnıkatsııalar qyzmetinde.

Onyń aıtýynsha, qazirgi kezde jazany oryndaıtyn organdar 878 sottalǵanǵa qatysty sottarǵa qamaý merzimin qysqartý jáne jazadan bosatý týraly usynystar joldady.

«Tergeý organdary sotqa deıingi tergep-tekserý barysynda orta dárejeli qylmysty jasaǵan 5 kúdiktige qatysty qylmystyq qýdalaýdy toqtatty. Qalǵandary aýyr jáne asa aýyr qylmystardy jasaǵan, olarǵa raqymshylyq sot tártibimen qoldanylatyn bolady», - dedi Bas prokýratýra ókili.

Osy oraıda olarǵa qatysty berilgen jazalardyń merzimi qaıta qaralmaq.

Budan buryn habarlanǵandaı, bıyl 2 qarashada Memleket basshysy «Raqymshylyq jasaý týraly» Qazaqstan Respýblıkasynyń Zańyna qol qoıdy.