Raketkany alǵash 7 jasymda qolǵa aldym: Tennısshi Beıbit Juqaevpen suhbat
- Beıbit, bıyl álemdik reıtıng ide jaqsy kóterilip kelesiń. Jyl basynda 308-satyda tursań, qazirgi kezde 263-oryndasyń. Degenmen ǵalamtor keńistiginde óziń týraly aqparat joqqa jaqyn. Sondyqtan qaıda dúnıege keldiń, tennıspen aınalysýdy qashan bastadyń, eger ol bolmasa, sporttyń basqa qaı túrin tańdar ediń ? Aldymen osy saýaldarǵa jaýap berseń .
- Aqtaýda dúnıe esigin ashtym. Otbasymyzben shetelge demalýǵa barǵan kezde 7 jasymda qolyma alǵash ret raketkany ustadym. Qonaqúı aýmaǵynda kort bar eken, aǵammen birge oınap kórýge bel býdym. Dopty árli-berli asyrǵan maǵan unady. Aqtaýǵa oralǵannan keıin jarty jyldan soń ata-anam meni tennıs sektsııasyna jazdy. Maralbek Dattyń tobynda balalarmen birge jattyqtym. Túrli sebeptermen kóp uzamaı ata-anammen birge Almatyǵa kóshtim. Munda tennıske kóbirek den qoıyp, jeke aınalysa bastadym. Zarına Dııastyń burynǵy bapkeri, chehııalyq Peter Pavlonyń kózine túsip, 2013 jyldan bastap úsh jylǵa jýyq ýaqyt boıy sol kisi baýlydy. Tehnıkamdy jetildirgeni úshin oǵan alǵysym sheksiz, óıtkeni 13 jasymda ózimniń qurdastaryma qaraǵanda, sheberligim kem boldy. Peterdiń arqasynda jaqsy alǵa bastym.
Tennısti nege tańdadyń degenge kelsem, bul sport túri maǵan qarqyndylyǵymen ári únemi oılap oınaý kerektigimen unady. Eger tennıs bolmasa, oqýdy jalǵastyrar edim. Mektepte men ozat oqýshy boldym. Jeke mektepte matematıka men aǵylshyn tili baǵytynda bilim aldym. Ustazdarym sportqa ketpeı, bilim jolynda qalýymdy ótindim. Degenmen men kásibı tennısshi bolýdy qaladym.
- Tennıs jaı qyzyǵýshylyq emes, kásip ekendigin qashan uqtyń?
- Muny Peter Pavlomen jumys isteı bastaǵan kezde túsindim. Sonda alǵashqy halyqaralyq saparlarym bastaldy, jattyǵý úzilgen joq, sondyqtan keri oralýǵa bolmaıtynyn uǵyndym.
- Qaı tósenishte oınaǵandy jaqsy kóresiń, kógalda ma, topyraqta ma, hardta ma?
- Alǵashqy kúnnen bastap hard tósenishinde jattyqtym. Mysaly, Aqtaýda topyraq tósenishinde eshqashan oınaǵan joqpyn. Sebebi onda zalda hard pen kilem ǵana boldy. Sondyqtan shynymdy aıtsam, hard meniń oń jambasyma keledi. Kógal tósenishinde de ózimdi jaqsy sezinemin.
- Qarapaıym aqtaýlyq jigitke álemdik reıtıng ide TOP-300-ge ený qanshalyqty qıyn boldy?
- Iá, ATR reıtıngisiniń TOP-300-ine kirý úshin uzaq ta kúrdeli joldan ótýge týra keldi. Ony tipti jaýyma da tilemes edim. Onyń ústine udaıy jattyǵýmen birge oqýdy qaldyrǵym kelgen joq. 2009 jyldan bastap eseptegende, TOP-300-ge ený úshin baqandaı 14 jyl kerek boldy. Aqtaý Astana, Almaty, Shymkent, Qaraǵandy sııaqty tennıs damyǵan qala emes-ti. Onda «Qazatomónerkásip» UAK«AQ janynda bir ǵana tennıs ortalyǵy bolatyn. Ol bar bolǵany eki jabyq, eki ashyq korttan turatyn. Kaspıı jaǵalaýynda turǵan shaǵyn qaladan osyndaı deńgeıdegi tennısshiniń ósip shyǵatynyn ol kezde eshkim oılamaǵan shyǵar. Qazaqstan tennıs mektebiniń tól túlekteri qatarynan ATR reıtıngisinde qazir men bárinen joǵary turmyn. Sondaı-aq bıyl halyqaralyq dárejedegi sport sheberi atandym.
- Instagram -paraqshańa Novak Djokovıchtiń ózi jazylǵan. Bul qalaı boldy? Serbııalyq tennısshi «Úlken dýlyǵa» týrnırlerinde 23 dúrkin chempıon atanyp, 47 -ret jartylaı fınalǵa shyǵyp otyr. 36 jasqa kelgenine qaramastan, onyń tamasha óner kórsetýi ne sebepten dep oılaısyń?
- Men Novakpen ótken jyly Astanada ATR 500 jarysynda tanystym. Jattyǵý úshin sparrıng áriptes izdep edim. Maǵan Novaktyń da sondaı oıynshyny izdep júrgenin aıtty. Sóıtip sáti túsip, alǵash ret ataqty tennısshimen dop qaǵystym. Ol maǵan oıyndy qalaı jetildirýge bolatyny jóninde aqyl-keńesin berdi. Sóılese kele, meniń qaıda jattyǵyp júrgenimdi surap, Belgradtaǵy óziniń akademııasyna shaqyrdy. Ázirge onda bara qoıǵan joqpyn. Degenmen jyldyń sońynda nemese kelesi maýsymda sáti túser dep oılaımyn. Novak sııaqty oıynshylarmen jattyǵýdyń ózi bir ǵanıbet, keremet áser alasyń, odan bárin úırengiń keledi. Djokovıch – ǵajap tennısshi. 36 jasynda barlyq týrnırlerdiń basty favorıti bolyp júr. Bir qyzyǵy, ótken jyly Astana dodasynyń alǵashqy aınalymynda men nıderlandylyq Botıkpen sheberlik baıqastym. Eger ony jeńgende, Djokovıchpen kezdeser edim.
- Bıyl tym-táýir nátıjeler kórsetip kelesiń. Alǵash ret chellendjer týrnıriniń fınalyna shyqtyń. Los-Kabosta irikteý saıystarynan ótip, ATR 250 jarysynda óner kórsettiń. Tipti alǵashqy aınalymda Ilıa Ivashkamen básekede match-poınttaryń boldy, biraq ony ne sebepti paıdalana almadyń?
- Bıyl maýsym aıynda birinshi ret chellendjer jarysynyń fınalynda oınadym. Shyny kerek, bulaı alysqa baramyn dep oılaǵanym joq. Óıtkeni jyldyń basy men úshin sátsiz boldy. Tek jazǵa qaraı jaqsy kórsetkishterge qol jetkize bastadym. Atalǵan týrnırdiń fınalynda kúshim jetpedi, óıtkeni oǵan deıin úsh setke, 3-3,5 saǵatqa sozylǵan úsh match ótkizdim. Soǵan qaramastan, sońǵy básekede ekinshi setti alatyndaı múmkindigim boldy, biraq sáttilik te jetispedi. Jyl aıaǵyna deıin taǵy eki chellendjerge baramyn, jekeleı synda jeńimpaz atanýǵa tyrysamyn.
- Alda Qytaıdyń Hanchjoý qalasynda Azııa oıyndary ótkeli tur. Qazaqstan quramasyna engeniń sen úshin kezdeısoqtyq pa, álde aldyn ala bildiń be? Azıadaǵa qandaı maqsatpen bara jatyrsyń?
- Kútpegen shaqyrtý boldy dep aıta almaımyn. Óıtkeni sońǵy tabystaryma baılanysty bapkerler meni quramaǵa engizgen eken. Maqsat – úzdik úshtikke iligý. Altyn – eń basty armanym, eger Azııada TOP-5-ke ensem, sony da qanaǵat tutar edim.
- Qazirgi reıtıng idegi ornyń US Open týrnıriniń irikteý saıystarynda oınaýǵa múmkindik beretin edi, nege qatyspadyń?
- Iá, maǵan AQSh ashyq chempıonatynyń irikteý jarysyna qatysýǵa bolatyn edi. Biraq oǵan bara almadym. Óıtkeni Los-Kabosta tizeden alǵan jaraqatym syr berdi. Azdap demalys alyp, emdelýdi jón kórdim.
- Tennısten basqa neni jaqsy kóresiń, fılm, kitaptar, ańshylyq, balyq aýlaý, álde basqa ma?
- Sońǵy kezde kitapty kóp oqımyn, serıaldardy qaraımyn.
- Aldaǵy maqsatyń qandaı? Seni Aýstralııa ashyq chempıonatynyń irikteý saıystarynan kóre alamyz ba?
- 2023 jyldy TOP-200-de aıaqtaǵym keledi. Sosyn, árıne, 2024 jylǵy Australian Open irikteýine barsam deımin.
-Suhbat bergenińe rahmet, Beıbit! Aldaǵy jarystarda tabys pen sáttilik tileımin.