Rahym Oshaqbaev Túrkııadaǵy tóńkeris kezinde Stambul áýejaıynda qandaı ahýal bolǵandyǵyn aıtyp berdi
«Qazirgi ýaqytta ázirge Túrkııaǵa at basyn burmaýǵa keńes beremin. Ásire siltegenim emes, biraq munda qaýipsiz emes sekildi. Almatydan Stambulǵa keshki saǵat 9-da kelgen áriptesterimmen bul oqıǵany jiti talqylaýǵa múmkindik týdy. Biz Koc University-ge oqýǵa attanyp bara jatqan bolatynbyz. Men Fast Track arqyly tólqujat baqylaýyna jyldam ótýge múmkindik aldym jáne áskerıler áýejaıdy jabardyń 15 mınýt aldynda ǵana ótip ketippin. Al meniń áriptesterim tólqujat baqylaýyna ótý úshin kezekte 2 saǵat turdy, olarǵa áýejaıda qalýdan basqa amal bolmady. Nátıjesinde, olar kampýsqa tańǵy 8-de biraq keldi», - dedi R.Oshaqbaev áleýmettik jelide.
Onyń sózine qaraǵanda, Stambul áýejaıyndaǵy jaǵdaı tolyqtaı baqylaýdan shyǵyp ketken.
«Saǵat 11-de (keshki - agenttik) kirý jáne shyǵý baǵyttaryn jaýyp tastaǵan, áýejaıda qyrýar adam jınalyp qaldy. Shamamen 12-lerde júzdegen adam qarý atyp kirgen. Áýejaıdaǵy adamdar Túrkııada áskerı tóńkeris jasalyp jatqandyǵynan habarsyz edi jáne bul DAISh sodyrlarynyń lańkestik áreketi dep eseptegen. Úreılengen jolaýshylar da, áýejaı qyzmetkerleri de júkterin tastap, qulap qalǵan azamattardy taptaı basyp, ortalyq kireberisten qasha jóneldi. Olar dúkenderge tyǵylyp, pana tabatyn jer izdedi. Adamdar aıǵaılap, áıelder men balalar jylap jatty. Kirip kelgen áserılerdi kórgen halyq eskalatordan tómen qaraı júgirip, ol jerde adamdardyń nópiri birin-biri basyp jatty. Dúken satýshylary týrısterdi jasyrýǵa tyrysty. Adamdar jerde jatty. Týrıster qaıdan pana tabarlaryn bilmeı dal boldy, biri jarylys qaýpinen úreılenip, áýejaıdan qashý kerek dep sheshti, ekinshisi syrtta atys bolýy yqtımal dep áýejaıdaǵy dúkenderde tyǵyldy. Azamattardy jartysy áýejaı syrtyna qaraı qashty. Degenmen, qalaǵa shyǵatyn múmkindikteri bolmady. Áriptesterimniń sózderi boıynsha, adamdar týǵan-týystaryna telefon shalyp jatty, sebebi olar tiri qalmaýymyz da múmkin dep oılady», - dep atap ótti ol.
Úreı shamamen bir saǵattan soń, áýejaıdaǵylar qandaı oqıǵa oryn alǵandyǵyn bilgen keıin seıilgen.
«Anyqtalǵanyndaı, «áýejaıǵa entele kirgen adamdar - tóńkeriske qarsy shyqqan Erdoǵannyń jaqtastary eken. Olar eshkimdi óltirgen joq, uryp-soǵý bolǵan joq, alaıda ózderi tym susty boldy. Áýejaı qyzmetkerleri adamdardyń tastap ketken júkterin zal ortasyna jınady. Biraq keıbir adamdar júkterin taba almady, múmkin basqa azamattar ony qarbalas kezde qatelesip, alyp ketken bolýy kerek. Shamamen tańǵy saǵat 4-te metro ashyldy jáne týrsıterdiń qalaǵa shyǵýlaryna múmkindik jasaldy. Metroda qaýip bolǵandyqtan, poıyzdar kóptegen stansalarda jaryqtaryn qosyp, ótip ketti. Bizdiń áriptesterimiz metroǵa jetkennen keıin, áýejaıda jarylystar oryn alǵan. Ol týraly jiti aqparat áli belgisiz.
Stambul áýejaıynda oryn alǵan oqıǵa Túrkııa bıliginiń qaýipsizdik elementterine qatysty baqylaýdy tolyqtaı joǵaltyp alǵandyǵyn kórsetedi jáne jolaýshylar múldem qorǵansyz kúıde qaldy. Túrkııanyń syrtqy jáne ishki ahýalyna qatysty qaterlerdi eskere otyryp, Stambul áýejaıy azamattar úshin qaýipsiz emes degen uıǵarym jasaýǵa bolady», - dep túıdi R.Oshaqbaev.