Rahym Oshaqbaev memlekettik apparattyń jumysyn qaıta formattaýdy usyndy

NUR-SULTAN. QazAqparat – «Talap» qoldanbaly zertteýler ortalyǵynyń basshysy Rahym Oshaqbaev Qazaqstanda memlekettik basqarýdy odan ári damytý boıynsha óz usynystaryn bildirdi, dep habarlaıdy QazAqparat tilshisi.

Sarapshynyń pikirinshe, neǵurlym tıimdi memlekettik basqarý men azamattardyń basqarýshylyq sheshimderdi qalyptastyrýǵa qatysýyna suranys álemdik trendke aınalyp otyr.

«Júrgizilgen taldaý memlekettik apparattyń jumysyn qaıta formattaý, ekonomıkadaǵy memlekettiń úlesin qysqartý, azamattyq qoǵamdy memlekettik saıasatty ázirleýge tartý jáne basqarýshylyq sheshimderdi qabyldaý qajettigin kórsetti. Problemaly aımaqtar arasynda biz mynalardy anyqtadyq: josparlaýdyń tar sheńberi nemese «shotermızm», memlekettik josparlaýdyń úlken júıesi, memlekettik fýnktsııalardyń artyqtyǵy jáne qaıtalanýy, memlekettik apparattyń tehnologııalylyǵy men tsıfrlanýynyń tómen deńgeıi, sondaı-aq memlekettik apparattyń azamattarmen ózara is-qımyl tetikteriniń tıimsizdigi. Paradıgmany aýystyryp, túbegeıli jańa tásilderdi engizý qajet», - deıdi Rahym Oshaqbaev Qazaqstandy modernızatsııalaý jáne júıeli reformalardy júrgizý máseleleri boıynsha zertteý jumystaryn tanystyrý kezinde.

Aıta ketsek, búgingi onlaın baspasóz máslıhatynda Álemdik ekonomıka jáne saıasat ınstıtýtynyń sarapshylary eldi jańǵyrtý máseleleri boıynsha júrgizilgen júıeli saraptamalyq zertteý nátıjelerin tanystyrǵan bolatyn. Ǵylymı jobanyń basty qorytyndylary onlaın-kórsetilim barysynda tanystyryldy. Aýqymdy zertteý jumysy QR Tuńǵysh Prezıdenti – Elbasy Qorynyń tapsyrmasy boıynsha 2019 jyly bastalǵan.