Rahym Oshaqbaev qoǵamdyq keńestiń tıimdiligi týraly pikir bildirdi

NUR-SULTAN. QazAqparat – «TALAP» qoldanbaly zertteýler ortalyǵynyń dırektory Rahym Oshaqbaev qoǵamdyq keńester qyzmetiniń tıimdiligine baǵa berdi, dep habarlaıdy QazAqparat tilshisi.

«Qoǵamdyq keńes – halyq únine qulaq asatyn memleket tujyrymdamasyn iske asyrý sheńberindegi basty ınstıtýttardyń biri. Onyń maqsaty - barlyq deńgeıde sheshim qabyldaýda azamattyq qoǵamnyń múddesin bildirý jáne eskerý. Meniń saraptamalyq baǵalaýym boıynsha, bul - ortalyq atqarýshy organdardyń, oblystyq jáne aýdandyq deńgeıdegi ákimdikterdiń túrli deńgeılerdi qamtý aýqymyna baılanysty shyn máninde teńdessiz ınstıtýt», – dedi Rahym Oshaqbaev ortalyq kommýnıkatsııalar qyzmetinde ótken brıfıngide.

Ol ulttyq kompanııalar janynan qoǵamdyq keńes qurylyp jatqanyn aıryqsha atady.

«Bizdegi qoǵamdyq keńesterdiń aýqymy óte úlken, men mundaı deńgeıdi esh jerde kórmegen shyǵarmyn. Ol josparlaý jáne oryndaý kezeńindegi, sondaı-aq esep berý kezeńindegi bıýdjetterdi taldaýdy qamtyp otyr. Qoǵamdyq keńeske kirgen adamdar atqarýshy organ basshylyǵynyń aldyna óz quzyretine jatqyzylǵan kez kelgen máseleni qoıa alady. Bul organdardyń basshylary zań boıynsha olardy nazarǵa alýǵa jáne qaraýǵa mindetti», - dedi ortalyq basshysy.