Rahym Oshaqbaev: AQSh Qazaqstanǵa 30 mlrd dollar ınvestıtsııa quıdy

ASTANA. QazAqparat - Amerıka Qurama Shtattary Qazaqstanǵa ınvestıtsııa salýda aldyńǵy qatardaǵy memleketterdiń biri. Bul týraly «Talap» qoldanbaly zertteýler ortalyǵynyń dırektory Rahym Oshaqbaev aıtty, dep habarlaıdy QazAqparat.

«Prezıdenttiń bul jolǵy saparynyń basty maqsaty - Amerıka Qurama Shtattarynyń jańa ákimshiligimen senimdi baılanys ornatý bolyp tabylady. Kezdesý AQSh Prezıdenti Donald Tramptyń bastamasymen bolatyndyǵyn erekshe atap ótý kerek. Bul - Prezıdent Nursultan Nazarbaevtyń AQSh-qa jetinshi sapary», - deıdi Rahym Oshaqbaev Qazaqstan Prezıdentiniń AQSh-qa resmı saparyna qatysty «QazAqparat» HAA tilshisine bergen pikirinde.  

Sarapshynyń sózine súıensek, Qazaqstannyń AQSh-pen ıadrolyq qarýsyzdandyrý salasynda aıtarlyqtaı jemisti qarym-qatynas ornata bildi.

«Eger esterińizde bolsa, amerıkalyq tarap Qazaqstannyń óńirlik qaýipsizdik salasyndaǵy jáne eń aldymen Aýǵanstanǵa qatysty ustanymyn erekshe atap ótken bolatyn. AQSh sonymen birge, Birikken Ulttar uıymyna tóraǵalyq etýde Qazaqstannyń úmitkerligine qoldaý bildirgen. Qazaqstannyń aımaqtyq formatta da Amerıkamen yntymaqtastyǵy jaqsy jolǵa qoıylǵan», - deıdi ol.

Sondaı-aq Rahym Oshaqbaev sondaı-aq, eki eldiń ekonomıka salasyndaǵy baılanysyn atap ótti.

«AQSh Qazaqstanǵa qarjy quıyp otyrǵan iri ınvestorlardyń biri. 2005 jyldan beri AQSh bizdiń elge 30 mıllıard AQSh dollaryna jýyq ınvestıtsııa salǵan. Qazaqstanda 500-ge jýyq amerıkalyq kompanııa jumys istep jatyr. Sondyqtan, osy sapardaǵy mindet - eki eldiń arasyndaǵy strategııalyq yntymaqtastyqty nyǵaıtý bolyp tabylady», - deıdi sarapshy.