«Rahmet, papa»: Dımash Qudaıbergen atasy jaıly emotsıonaldy post jarııalady

ASTANA. QazAqparat – Saǵan degen alǵysymdy sózben jetkize almaspyn. Álemge áıgili ánshi Dımash Qudaıbergen Instagram-daǵy paraqshasynda atasy Qudaıbergen Aıtbaıulynyń qazasyna oraı post jarııalap, otbasylyq fotolarmen bólisti, dep habarlaıdy QazAqparat.

«Rahmet, papa… Maǵan bergen qanattaryń úshin, maǵan kókke qalaı kóterilip, kókjıegimdi keńeıtýdi úıretkeniń úshin, 100 mektep bere almaıtyn rýhanı tálimiń úshin…Saǵan degen alǵysymdy sózben jetkize almaspyn. Aıtqandarymnan aıtyp úlgermegenim kóp. Qosh bol, áketaı! Máńgi júrektesiń! Janyń jumaqtan oryn tapsyn. Seniń kenjetaıyń… Kóńil aıtyp jatqan barlyq aǵaıynǵa Alla razy bolsyn! Otbasylaryńyzda qaıǵy-muń bolmasyn…», - dep jazdy Dımash.

Eske salaıyq, Dımash Qudaıbergenniń atasy – Qudaıbergen Aıtbaıuly 13 maýsym kúni 82 jasqa qaraǵan shaǵynda dúnıeden ozdy. Prezıdent Qasym-Jomart Toqaev qazaǵa baılanysty Aıtbaevtar áýletine kóńil aıtý jedelhatyn joldady.

Q.Aıtbaıulynyń janazasy Astana qalasyndaǵy «Áziret Sultan» meshitinde shyǵarylyp, ony jaqyndary men týystary aqtyq saparǵa shyǵaryp saldy.