Rahat Álıevtiń kúıeý balasyna tıesili qus fabrıkasy memleketke qaıtaryldy

QONAEV. QazAqparat – Almaty oblysynyń mamandandyrylǵan aýdanaralyq ekonomıkalyq soty Jalqamys qus fabrıkasyn memlekettik menshikke qaıtarý týraly úkim shyǵardy, dep habarlaıdy QazAqparat tilshisi.

Almaty oblystyq prokýratýrasynyń aqparatyna qaraǵanda, atalǵan fabrıka Rahat Álıevtiń týysy, amerıkandyq «American Investments» korporatsııasynyń prezıdenti Issam Salah Horanıge tıesili bolǵan.

Іs negizinen Lıvan týmasy Issam Salah Horanıdiń tóńireginde. 1998-2008 jyldar aralyǵynda onda Qazaqstan azamattyǵy bolǵan. Al, qazir ol Palestına azamaty. Horanı «American Investments» amerıkalyq korporatsııasynyń prezıdenti, sonymen qatar Rahat Álıevtiń qaryndasy Gúlshat Horanıdiń jubaıy. 2008 jyldan beri Issam Salah Horanı Shveıtsarııa, Lıvan jáne Qazaqstanda jasaǵan qarjy bopsalaý qylmystary úshin Interpol izdeýinde bolǵan.

Talǵar aýdandyq prokýratýrasy osy ýaqytqa deıin Jalqamys qus fabrıkasyn jekeshelendirýge jaramsyz dep tanyp, ony memleket menshigine qaıtarý týraly talap-aryz túsirgen bolatyn.

1999 jyly aktsııalardyń memlekettik paketi (90 paıyz) amerıkalyq «American Investments» korporatsııasyna syıǵa tartylǵan.

«1999 jyly naýryz aıynda Talǵar aýdanynyń ákimdigi Aq-qanat» AQ-nyń paıdalanýyndaǵy jalpy aýdany 665,4 gektar 4 jer ýchaskesin amerıkalyq korporatsııa paıdasyna 5 jylǵa shyǵarý týraly sheshim shyǵardy. Sol jyldyń qazanynda alynǵan 665,4 gektar jerdiń 56 gektary «Altyn-Aıdar» JShS-ne berildi», - delingen prokýratýra habarlamasynda.

Keıin, ıaǵnı 2001 jyly atalǵan aýdan ákimdigi «American Investments» kompanııasynan «Altyn-Aıdar» seriktestiginiń paıdasyna 609 gektar jerdi paıdalanýdan shyǵarǵan. Ol 6 jer telimine bólinip, 2002 jyly Talǵar aýdany ákimdigi men «Altyn-Aıdar» JShS arasynda 49 jylǵa tıisti jalǵa berý sharttary jasalǵan.

«Muraǵat málimeti boıynsha Almaty aýmaqtyq memlekettik múlik jáne jekeshelendirý komıteti men «American Investments» amerıkalyq korporatsııasy arasynda qus fabrıkasyn óteýsiz berý týraly shart jasalmady. Óndiristi damytýǵa jáne kredıtorlyq bereshekti óteýge ınvestıtsııa salý bıznes-jospary ázirlenbedi jáne ýákiletti organǵa berilmedi. Qus fabrıkasy 29 jyl boıy jumys istemeı tur. Onyń resýrstary tozǵan, aýylsharýashylyq tehnıkasy men kólik quraldary eskirgen, qurylystarǵa aǵymdaǵy jáne kúrdeli jóndeý júrgizilmegen, ınvestıtsııalar salynbaǵan, salyq bereshegi bar.

Qus fabrıkasynyń múlkin ıelikten shyǵarý deregi ýaqtyly anyqtalǵan kezde Memlekettik múlik jáne jekeshelendirý komıtetiniń aýmaqtyq organy múlikti memleketke qaıtarý jóninde sharalar qabyldaýǵa mindetti boldy. Alaıda bul oryndalmady. Osyǵan baılanysty prokýror memleket múddesi úshin talap qoıdy», - delingen qujatta.

Sot is materıaldaryn zerdelep, sheshim shyǵardy. Úkimge saı, qus fabrıkasy men onyń jerleri memleket menshigine qaıtaryldy.