Rafaıl Qypshaqbaev antıvakserlerdiń sózi nege jurtqa jaǵymdy bolatynyn túsindirdi
«Qarańǵylyqpen kúresý qıyn ári berekesiz sharýa. Árıne, vaktsınatsııa máselesinde árkimniń eriktilik quqyǵy bar. Men árdaıym kez kelgen naýqannyń erikti júrgenin jaqtaımyn. Qandaı da bir sharaǵa májbúrleý keri reaktsııa týǵyzady. Bul jaǵdaıda ata-analarǵa vaktsınalaýdyń paıdaly ekenin, munyń ıgilik ekenin keńinen túsindirip,aýqymdy aqparattyq jumys júrgizý qajet», - dedi Rafaıl Qypshaqbaev Densaýlyq saqtaý mınıstri uıymdastyrǵan onlaın dáriste.
Onyń pikirinshe, antıvakser atalyp ketken toptyń qoǵamdyq pikirge áseri kúshti. Óıtkeni TikTok, Instagram sııaqty zamanaýı baılanys quraldaryn utymdy paıdalanady.
«Qazir halyqtyń kóbi aqparatty resmı kózderden, kásibı aqparat quraldarynan emes, áleýmettik jeliden izdeıdi. Sondyqtan resmı túsindirmelerdi qabyldaýy qıyn. Óıtkeni qazirgi adamdardyń nazary 30-40 sekýndtyq málimetten artyq dúnıege aýa bermeıdi. «Antıvakserlerdiń» sózi kópshilik úshin tartymdy ári túsinikti bolǵandyqtan, resmı medıtsına aqparat maıdanynda utylyp jatyr dep aıtýǵa bolady», - dedi ǵalym.
Sondaı-aq, ol tabıǵı ımmýnıtetke senim artyp, balasyn vaktsınalaýdan tartynyp otyrǵan ata-analarǵa úndeý tastady.
«Statıstıkaǵa súıensek, balalardyń shamamen 85%-y koronavırýs ınfektsııasyn sımptomsyz ótkeredi. Biraq qalǵan 15%-ynda aýrý asqynǵan formada júrý yqtımaldyǵy joǵary. Sımptomsyz aýyrǵan balalar aınalasyndaǵylarǵa juqtyrýy múmkin. Ásirese vırýs aldynda qaýqarsyz egde jastaǵy adamdarǵa juqtyrsa, saldary qıyn bolýy múmkin», - dedi maman.