Radıkalızmge adamdar qandaı sebeppen urynatyndyǵyn anyqtaý qajet - Dáýren Abaev

NUR-SULTAN. QazAqparat - Radıkalızmge adamdar qandaı sebeppen baratyndyǵyn anyqtaý qajet. Bul týraly búgin elordada ótip jatqan "Rýhanı Jibek joly. Islam jáne jastar: qazirgi zamanǵy syn-qaterler" taqyrybyndaǵy IV halyqaralyq dinı-ǵylymı konferentsııada QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

"Qolda bar altynnyń qadirin bilý de óte mańyzdy. Óıtkeni, búkil dúnıejúzi etnıkalyq, dinı, mádenı, áleýmettik turǵydaǵy bólinisterdiń daǵdarysyn bastan keshirip otyr. Keıde osy alaýyzdyq ashyq aıqastarǵa da ulasyp ketip jatatyndyǵy ókinishti. Dindi alǵa tartyp, terrorızm men ekstremızmdi nasıhattap júrgen keıbir «qoı terisin jamylǵan» jekelegen adamdardyń máselesi ótkir bolyp otyr", - dedi Dáýren Abaev.

Osy oraıda mınıstr radıkalızmge adamdar qandaı sebep boıynsha baratyndyǵyn anyqtaý qajettigine bas nazar aýdardy.

"Oǵan jekelegen adamdardy gýmanıstik, ıntellektýaldyq, mádenı jaǵdaılar ıtermeleýi múmkin. Sondyqtan da zamanaýı zaıyrly memlekettiń din ókilderi aımaqtardaǵy dástúrge mán berip, mádenı baǵyttaǵy, ǵylym men bilim salasyndaǵy artyqshylyqtardy eskerýi tıis dep oılaımyn", - dedi ol.

Aıta keteıik, konferentsııa jumysyna Eýrazııa jáne Uly Jibek joly elderiniń Bas múftıleri, din qaıratkerleri, dinı saladaǵy memlekettik organdardyń basshylary, laýazymdy tulǵalar, zııaly qaýym ókilderi, jalpy 300-ge jýyq delegat qatysyp otyr. Jastar jyly aıasynda ótip jatqan konferentsııa maqsaty - óskeleń urpaqty destrýktıvti aǵymnyń yqpalynan saqtandyrý, olarǵa durys dinı aqparat jetkizý, ekstremızm men terorızmniń aldyn alý maqsatynda Eýrazııa jáne Ortalyq Azııa elderi din qaıratkerleriniń kúshin biriktirý, tájirıbe almasý, "Rýhanı jańǵyrý" ıdeıasyn nasıhattaý.