Radıatsııalyq jáne bıologııalyq qorǵaý bólimsheleri urysqa jaqyndatylǵan jaǵdaıda jattyqty

NUR-SULTAN. QazAqparat – «Batyl toıtarys-2022» keshendi vedomstvoaralyq strategııalyq komandalyq-shtabtyq oqý-jattyǵý sheńberinde radıatsııalyq, hımııalyq jáne bıologııalyq qorǵaý (RHBK) bólimsheleri urysqa jaqyndatylǵan jaǵdaıda áreket etti, dep habarlaıdy QazAqparat Qorǵanys mınıstrligine silteme jasap.

Jattyǵýǵa 400-den astam áskerı qyzmetshi jáne RHBQ bólimsheleriniń 70-ten astam arnaıy tehnıkasy jumyldyryldy.

Turaqty ornalasý pýnkterinen belgilengen aýdanǵa bet alǵan áskerler baratyn baǵyttary men kórsetilgen aýmaqtarǵa radıatsııalyq, hımııalyq jáne bıologııalyq barlaý júrgizdi.

Bólimsheler kelgen soń jergilikti jerlerge RHB baqylaý beketteri qoıyldy.

Oqý-jattyǵýdyń praktıkalyq bóliminde zaqymdaý jaǵdaıyndaǵy is-qımyl tártibi pysyqtalyp, qarý-jaraq pen áskerı tehnıka da arnaıy óńdeldi.

Áskerler shabýyldaý áreketterin júrgizý kezinde nysandar aerozolmen búrkemelendi, al RHBQ áskerleriniń reaktıvti jaıaý ásker otshashqysh eseptoptary shartty qarsylastyń jumys kúshi men tehnıkasyn joıýǵa qatysty.

Sondaı-aq, RHBQ bólimsheleri TJM aýmaqtyq organdarymen birlesip tehnogendik sıpattaǵy tótenshe jaǵdaılardyń saldaryn joıý máselelerin pysyqtady.

«Radıatsııalyq, hımııalyq jáne bıologııalyq qorǵaý – jaýyngerlik qamtamasyz etýdiń bir túri. Sondyqtan, bólimshelerimizdiń qatysýynsyz is júzinde birde-bir oqý-jattyǵý ótkizilmeıdi», – dep atap ótti Radıatsııalyq, hımııalyq, bıologııalyq qorǵaý jáne ekologııalyq qaýipsizdik áskerleri departamentiniń bastyǵy polkovnık Erjan Qulmaǵambetov.

Sonymen qatar, bul ásker túrin jetildirý el Prezıdenti – Qarýly kúshterdiń Joǵarǵy Bas qolbasshysy Qasym-Jomart Toqaevtyń «qos maqsattaǵy» komponentterdi damytý qajettiligi týraly tapsyrmasyna sáıkes júrgizilip jatqany atalyp ótti.

Buǵan deıin teńiz jaıaý áskeriniń qala ishinde urys júrgizý boıynsha jattyǵý ótkizgeni jazylǵan.