Radıatsııalyq apat kezinde TMD elderi ózara kómekti jedel usynady

NUR-SULTAN. QazAqparat – Parlament Senatynyń jalpy otyrysynda «TMD-ǵa qatysýshy memleketterdiń ıadrolyq avarııa nemese radıatsııalyq avarııalyq ahýaldyń týyndaý jaǵdaıyna daıyndyqty jáne olardyń zardaptaryn joıý kezindegi ózara kómekti qamtamasyz etý boıynsha ózara is-qımyly týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Kelisim jobasy TMD Ekonomıkalyq Keńesiniń 2018 jylǵy 14 maýsymdaǵy otyrysynda maquldanǵan jáne oǵan 2018 jylǵy 2 qarashada elordada TMD úkimet basshylary keńesiniń otyrysy aıasynda Qazaqstan Respýblıkasynyń Premer-Mınıstri qol qoıdy.

«Osy Kelisimdi ratıfıkatsııalaý ıadrolyq avarııa nemese radıatsııalyq avarııalyq ahýal týyndaǵan jaǵdaıda TMD-ǵa qatysýshy memleketter arasynda aqparat pen kómekti jedel usynýǵa múmkindik beredi.

Qujat TMD-ǵa qatysýshy memleketterdiń ýákiletti organdary arasyndaǵy ózara is-qımyldyń tıimdiligi men ónimdiligin arttyrýǵa, atom energııasyn beıbit maqsatta paıdalanýǵa baılanysty kez kelgen yqtımal oqıǵalarǵa ýaqtyly den qoıýǵa baǵyttalǵan», - dedi Energetıka mınıstri Nurlan Noǵaev.

Kelisimniń taraptary: Armenııa, Belarýs, Qazaqstan, Qyrǵyz, Ózbekstan, Tájikstan Respýblıkalary jáne Reseı Federatsııasy.

Kelisim ıadrolyq avarııa nemese radıatsııalyq avarııalyq ahýaldyń týyndaý jaǵdaıynda mamandandyrylǵan qutqarý qurylymdaryn, mamandardy, qural-jabdyqtardy, kólik quraldaryn jáne osy qurylymdardy tehnıkalyq jaraqtandyrý úshin paıdalanylatyn materıaldardy transshekaralyq ótkizý rásimderin jeńildetýge múmkindik beredi.

«Qazaqstan Respýblıkasynyń «Atom energııasyn paıdalaný týraly» Zańyna sáıkes, atom energııasyn paıdalaný salasynda transshekaralyq avarııalar nemese oqys oqıǵalar týyndaǵan jaǵdaıda, Qazaqstan Respýblıkasy ratıfıkatsııalaǵan halyqaralyq sharttarǵa sáıkes ýákiletti organ azamattyq qorǵaý salasyndaǵy ýákiletti organmen birlesip, qulaqtandyrý jáne den qoıý jónindegi sharalardy qabyldaıdy.

Osyǵan baılanysty Kelisim ratıfıkatsııalaý úshin Qazaqstan Respýblıkasy Parlamentiniń Senatyna engizildi. Zań jobasyn qabyldaý keleńsiz áleýmettik-ekonomıkalyq jáne ózge de saldarǵa ákep soqpaıdy», - dedi mınıstr.